Истрагата за мистериозната смрт на шведската новинарка Ким Вал на подморницата на данскиот ексцентричен научник Петер Мадсен, се разви во една од најбизарните приказни на овој век.
Откако пред неколку дена во торба во заливот Коге Беј, јужно од Копенхаген полицијата ја пронајде главата и нозете на убиената новинарка, почнува да се составува мозаикот околу нејзината мистериозна смрт. Претходно, на 21 август беше пронајден трупот. Но, не само околу нејзината, туку и смртта на цела низа други убиства на обезглавени жени.
Зад овие монструозни злосторства веројатно се крие генијалниот иноватор и бизнисмен со крајно патолошка карактерна структура.
46 годишниот Петер Мадсен пловел низ светот со сопствена подморница која самиот ја конструирал, а средствата за изградба ги собрал со краудфандинг кампања. Ким Вал пред два месеци, како ексцентрична и медиумски интересна фигура, дошла да му прави интервју во подморницата, за потоа да исчезне.
Мадсен најпрво се држел до приказната дека новинарката по интервјуто ја истоварил на копно, но набрзо нејзиното торзо било пронајдено како плови по морето.
Подморницата “Наутилус” данскиот бизнисмен во меѓувреме ја потопил, тврдејќи дека потонала поради технички дефекти, меѓутоа, се верува дека тоа го направил за да ги скрие трагите од злосторството.
Другата верзија на неговата одбрана гласела дека Ким Вал настрадала во несреќа на подморницата, кога поклопецот ја удрил во глава, па тој нејзиното тело потоа го фрлил во морето. Но на нејзината глава не се наоѓаат никакви такви повреди.
Меѓутоа, не дал никакво објаснување на прашањето како телото на новинарката останало без глава и екстремитети. Подоцна, кога било утврдено дека телото било сечено со остри сечива, а новинарката има дури 14 убодни рани стомакот и гениталиите, Мадсен конечно бил обвинет за убиство и злоставување на трупот.
ДНК на жртвата била пронајдена на многу делови од телото на бизнисменот, вклучувајќи и гребаници по вратот и лицето.
Инспекторите, кога ја пребарувале потонатата подморница, откриле снимки на лап топот на Мадсен кои прикажуваат мачење и распарчување на други жени, за кои сметаат дека се снимки од вистински убиства. Мадсен се брани со тоа дека тој лап топ не бил само негов, туку го користеле и други.
Биографот на Мадсен подоцна ја објави приказната дека тој бил вклучен во сексуално експериментирање и покрај тоа што веќе бил во љубовна врска.
Полициски нуркачи во меѓувреме најдоа и пила во близина на рутата на подморницата, а истрагата треба да потврди дали таа е користена за обезглавување и отсекување на нозете и рацете на новинарката Вал.
Полицијата во Копенхаген потврди дека пилата е најдена во средата, во близина на рутата која ја поминала подморницата на Мадсен на 11 август.
Претходно неделава, Мадсен објави преку неговиот адвокат дека не сака повеќе да одговара на полициски прашања во врска со случајот.