Државната изборна комисија на денешната седница го усвои Извештајот за пријавените гласачи со спорни записи.
Согласно утврдениот Извештај на ДИК, своето право на глас на јавниот повик не го докажале 30.467 лица од вкупно 39.502 лица и тие ќе бидат избришани од Избирачкиот список.
До ДИК во рокот за пријавување од 26 јули до 19 август пристигнале 8.922 пријави, од кои 8.901 пријава се прифатени. Правната служба на Комисијата одбила 21 пријава.
Три или повеќе члена на ДИК во рок од 10 дена по истекот за пријавување можат да побараат дополнителна проверка за кое било од лицата.
Со Законот за дополнување на Изборниот законик ДИК беше задолжена да спроведе процес на активна регистрација на 39.502 лица за кои при спроведените административни и теренски проверки се утврдени спорни записи. Оттаму велат дека направиле се што е во нивна моќ за да ги информираат граѓаните за нивно пријавување.
ДИК по извршени дополнителни проверки преку споредба на списокот од 39.502 лица и Избирачкиот список иззема 113 лица за кои е утврдено дека шест се починати, 51 лице е на привремена работа или престој во странство, 54 го изгубиле избирачкото право по различни основи и две лица поднеле барање за промена на податоци во Избирачкиот список.