Членовите на Државната изборна комисија одлучија во недела да се прегласува во тетовското село Теарце. На седницата која се одржа попладнево членовите едногласно се согласија дека гласањето на избирачкото место 2011 ќе се повтори.

„Вкупниот број на запишани избирачи на ова избирачко место влијае врз вкупните резултати на ниво на изборна единица шест. Повтореното гласање на гласачкото место број 2011 во општина Теарце ќе се одржи на 25 декември 2016 година односно 14 дена од денот на гласањето“, изјави претседателот на ДИК Александар Чичаковски.

Претседателот на Државната изборна комисија, Александар Чичаковски не одговори на прашањата на новинарите дали гласањето во недела ќе го спроведе истиот избирачки одбор од 11 декември.

Одлуката на ДИК да се прогласува во Теарце, доаѓа по вчерашното прифаќање на тужбата на СДСМ од Управниот суд, кој реши да го поништи гласањето во избирачкото место 2011. Таму се запишани вкупно 714 гласачи, а на 11 демекври на гласање излегле 404 гласачи, од кои 91 гласале за ВМРО-ДПМНЕ, 87 за СДСМ. 65 гласа добила БЕСА, ДПА 64, ДУИ 53, Алијанса за Албанците 25 и по еден глас Третиот блок предводен од Демократски сојуз и ВМРО за Македонија.

Во целата Изборна единица 6 за ВМРО-ДПМНЕ гласале 26.135 гласачи, а за СДСМ 25.828. Разликата е 307. Прегласувањето би можело да го смени целокупниот изборен резултат, кој сега е 51 мандат за ВМРО-ДПМНЕ и 49 за СДСМ.