Државната изборна комисија го објави упатството за гласање. Единствено жителите на Скопје ќе гласаат на четири гласачки ливчиња, две за општината во која живеат, и две за Град Скопје.
Гласањето се врши лично, на 3.480 гласачки места во земјава. Гласањето се врши тајно, зад параван. Избирачот гласањето за избор на градоначалник на општина и град Скопје го врши на тој начин што го заокружува редниот број пред името и презимето на кандидатот, а за членови на Совет на општина и град Скопје го заокружува редниот број пред подносителот на листата за која се определил. Преклопеното гласачко ливче избирачот го става во соодветно обележаната кутија за гласање.
Гласањето за друго лице е забрането, освен за случаите предвидени во Изборниот законик.
Право на глас на претстојните локални избори што ќе се одржат на 15 октомври, ќе имаат 1.814.644 гласачи, соопшти Државната изборна комисија (ДИК), по заклучувањето на избирачкиот список и по извршените промени што произлегоа од јавниот увид.
Во изводите од избирачкиот список се запишани 1.735.682 гласачи, 77.071 избирач се на привремена работа или престој во странство, 1.882 за време на изборите ќе се наоѓаат на издржување казна затвор или во притвор, а девет гласачи се запишани како внатрешно раселени лица.
Шестите локални избори во Македонија, на 15 октомври, ќе се спроведат во 80 општини и во Градот Скопје.
Вториот круг на изборите е закажан две недели подоцна, односно на 29 октомври.