Пријавени да гласаат ден порано од останатите поради здравствени причини, за Локалните избори, седми по ред, кои ќе се одржат в недела, се и 476 лица со ковид-19 и лица во изолација. Посебно од оваа бројка, пријавени се 7921 болни и изнемоштени лица. Во казнено-поправните установи во земјата право да гласаат имаат 1899 лица, а во установи за вонсемејна грижа се пријавиле 351 лице. Право на глас имаат и шест внатрешно раселени лица, изјавуваат за НоваТВ од ДИК.
Од Државната изборна комисија нагласуваат дека колку од овие пријавени лица и ќе гласаат ќе се знае до утре изутрина .
– Не значи дека сите барања на лицата кои се пријавиле да гласаат и ќе бидат прифатени. Чекаме точни податоци од општинските изборни комисии и на првата прес-конференција на ДИК утре ќе ги објавиме бројките за тоа колку лица со ковид-19 и во изолација, болни и изнемоштени, ќе гласаат на изборите. Еве на пример, во Струмица од 332 барања од болни лица вкупно 328 се прифатени, а 4 барања се одбиени, според општинската изборна комисија. Што се однесува до затворениците, 1899 се со право на глас, а дали ќе го остварат тоа право останува да се види утре – ни рече Адмир Шабани, портпарол на ДИК.
Од ДИК уште информираат дека за утрешниот ден ќе има на располагање една до две медицински екипи во секоја општина, за гласање на болните и изнемоштените лица и лицата со Ковид-19, како и за стационираните во старските домови.
Избирачите кои се наоѓаат на издржување мерка куќен притвор на денот на гласањето, а сакаат да гласат, за тоа ќе ја известат ОИК преку овластен полномошник и тоа најдоцна три дена пред денот определен за гласање, а тоа е до завчера, 13 октомври на полноќ.
(Љ.Б.)