Државната изборна комисија (ДИК) утре ќе организира симулација на безбедно гласање со примена на сите мерки и здравствени препораки на едно избирачко место на кое што ќе бидат поканети сите медиуми, домашни и странски меѓународни мисии, посебно ОБСЕ/ОДИХР, од Министерството за здравство, претставници на амбасадите и на политичките партии Ќе биде опфатен целиот избирачкиот процес во реални услови.
„Почнувајќи од доаѓање на граѓани на избирачко место, чекање, влегување, дезинфекција, идентификација, се што е по закон, со посебно напоменување на сите здравствени мерки кои треба да ги почитуваат граѓаните, но и самите изборни органи и домашните и странските набљудувачи“, најави Борис Кондарко, член на ДИК.
На денешната седница на ДИК беше најавено, исто така, дека граѓаните ќе можат да гласаат на изборите на 15 јули со пасоши чија важноста истекла од 18 март наваму, за време на вонредната состојба, имајќи предвид дека тие ќе имаат важност до 31 јули. Кондарко информираше дека на гласање граѓаните нема да смеат да одат со маски на кои што ќе има амблеми на политички партии, бидејќи тоа ќе се третира како агитирање на избирачкото место што е забрането со закон.
На 13 и 14 јули, кога гласаат лицата со Ковид-19, во изолација, болни, немоќни и хронично болни, членови на ОИК и на ИО, ќе можат да бидат ослободени од работа доколку има потреба да бидат ангажирани и овие два дена.
Рокот за пријавување на гласање на лицата со Ковид-19 и во самоизолација или во карантин завршува утре на полноќ. Освен со полномошник, тие ќе можат да се пријават за гласање и преку апликацијата за пријавување за гласање на овие лица поставена на веб страната на ДИК https://izolacija.sec.mk/.
ДИК на денешната седница вршеше избор на нови членови на место на оние лица кои барале изземање од ОИК или од избирачките одбори.
До ДИК се пристигнати голем број на барања (80 оправдани и 20 неоправдани) за изземање од здравствени работници кои ќе бидат ангажирани на 13 јули за гласањето на лицата со Ковид-19 и во самоизолација. Во овие посебни избирачки одбори се избрани 300 здравствени работници.
Членот на ДИК, Елизабета Постолоска, како што рече, ги замолува здравствените работници на разбирање, додавајќи дека сите сме свесни дека се тие на удар и ангажирани во последните месеци поради пандемијата со Ковид-19.
„Ако продолжиме со ваков интензитет на изземање ние нема да можеме да формираме избирачки одбори“, рече Постолоска.
Државната изборна комисија на денешната седница го отфрли приговорот на Никола Димитров, носител на кандидатска листа во ИЕ 1 на СДСМ поднесен за попречување на изборна кампања за портпаролот на ВМРО-ДПМНЕ, Наум Стоилкоски, со барање тој да биде парично казнет за тоа, како што предвидува законот и тоа меѓу 2.000 и 6.000 евра. ДИК, како што нагласи, Постолоска е ненадлежна за ова и упати Димитров приговорот да го поднесе до Основниот суд.
На 9 јули истекува рокот на за пријавување на набљудувачи на предвремените парламентарни избори. Барања за акредитирање на домашни и странски набљудувачи до ДИК пристигнуваат секојдневно. Денеска има уште три нови. ДИК досега акредитирала набљудувачи од Амбасадата на Унгарија (10), Асошиејтед Прес (2), од Здружението за Национален Ромски Центар (38), од Амбасадата на Австрија (3), од Ал Џезира (1), од Амбасадата на Швајцарија (3) и од Здружението „Анкциоз 2017 година“ (796) набљудувачи.
До денеска се акредитирани вкупно 1.183 домашни набљудували од кои 905 отпаѓаат на МОСТ и 278 на Цивил. Вкупната бројка на меѓународните набудувачи е 110, меѓу кои има и од Канадската амбасада во Белград, од ОБСЕ/ОДИХР и од амбасадите на Франција, на Албанија, на Холандија и на САД.