Шефот на македонската дипломатија, Никола Димитров, вели во процесот на преговори за името со Грција идентитетските прашања воопшто не треба да бидат дел, бидејќи во спротивно проблемот не би се решил никогаш.
Тој ги негираше шпекулациите дека во преговорите со Грција се разговара и за идентитетот.
„Преговорите не се почнати, во моментов ги исцртуваме контурите на кое ниво, во каков формат и кога ќе почнат. Не е корисно да се шпекулира за нешто што е брифинг на министерот Коѕиас или не е. За тоа треба директно да се праша Коѕиас. Сметам дека идентетитските прашања треба да ги извадиме од тој процес на преговори, затоа што во спротивно, проблемот никогаш нема да биде решен“, изјави денеска Димитров на прес-конференција која се одржа во Владата.
Според министерот, ова прашање се избегнува во јавноста, но како што вели тој, политиката подразбира преземање одговорност, како и дека носи одговорност за нерешавање проблеми и за пропуштени шанси.
Во однос на информациите за ревидирање на историјата, особено на делот кој се однесува на бегалците од Егејска Македонија, Димитров рече дека ако сакаме да се развијат односите меѓу двете земји, треба да се прашаат историчарите како Грците гледаат на нас и обратно.
За претстојната регионалната средба во Солун, на која ќе учествуваат министрите за надворешни работи и од Албанија и од Бугарија, Димитров рече дека ќе биде фокусирана на енергетската, економската и на регионалната соработка.
Тој потврди дека засега предвидено е преговорите да се водат билатерално.