Новиот министер за надворешни работи, Никола Димитров кој денеска од својот претходник Никола Попоски ја презеде функцијата, вели првата негова билатерална посета ќе биде во Атина, затоа што најголемиот проблем е токму со овој сосед.
– Со Коѕиас разговаравме по телефон, како и со колешката од Бугарија. Мојата цел е првата билатерална посета да биде во Атина, бидејќи таму имаме најголем проблем. На регионот сакам да му покажам дека од денес имаме ново лице. Јас сум убеден дека успешна и среќна Македонија е добра вест за целиот регион, изјави Димитров.
Тој дополни дека негова цел е Македонија да биде почитувана од соседите и светот, да има добрососедски односи и пријатели од светот.
– Ова е нов почеток. Не сакам да се вртам назад туку сакам да одиме напред. Ова министерство не е на ниту една партија. Ќе работам да се дигне достоинството а надворешната политика да се создава во ова Министерство. Факт е дека од вчера имаме една реформска влада која сака да започне преговори со ЕУ и да влезе во НАТО. Сакаме да бидеме почитувани и да имаме пријатели, како и да имаме добрососедски односи, рече тој.
Димитров воедно се обврза на целосна транспарентност на начинот на кој ќе функционира ова министерство, и дека се што ќе прави тој и неговиот тим, ќе биде отворено за јавноста.
По вчерашното изгласување на Владата, Димитров воедно, одговарајќи на прашањето на НОВА за односите со Србија, односно влезот на српскиот дипломат Горан Живаљевиќ за време на “крвавиот четврток“ како еден од демонстрантите, рече дека тоа е пластичен пример за мешањето на една држава во внатрешните работи на друга.
– Ние сакаме добри односи со сите и на тоа ќе работиме многу интензивно. Моите први билатерални средби ќе бидат во регионот. Не е добро новите односи кои сакаме да ги градиме да започнат со скандали. Ќе се обидам прашањето со Србија да го затворам без да има голем скандал, меѓутоа не е добар стартот и од другата страна. Во Собранието имаше практично државен удар кој пропадна…не може да се биде биде дел од толпата која влезе во Собранието а да тврдите дека не се мешате во внатрешните работи. Попластичен пример од овој за мешање во внатрешните работи нема. Јас како дипломат влегувам од главната врата во други држави, ме чекаат, се претпоставувам и одам на состанок. Не мислам дека ова треба да биде проблем. Србија има интерес Македонија да успее, и Македонија има интерес Србија да успее и ќе градиме мостови, изјави Димитров.