Горан Живаљевиќ, офицерот на српската разузнавачка агенција ­ БИА, дипломат и советник во српската амбасада во Скопје на 27 ­ ми април, за време на инцидентите бил во Собранието и направил селфи со разулавената топла во позадина во собраниската сала.

Неговото присуство во Парламентот за време на крвавиот четврток отвори многу прашања. Каква била улогата на Горан Живаљевиќ во насилните протести во Парламентот, бидејќи оваа постапка е надвор од протоколот на дипломатите?

Горан Живаљевиќ тврди дека бил присутен во Собранието по службена должност за да види дали во инцидентите учествуваат и лица од Србија, навивачи или екстремисти.

Живаљевиќ на дипломатска мисија во Македонија е од јули 2015, како припадник на српската разузнавачка служба БИА и акредитиран офицер за врска со Агенцијата за разузнавање и Управата за безбедност и контраразузнавање на Македонија во српската амбасада во земјава.

Живаљевиќ ја прекршил „Виенската конвенција“

Безбедносни експерти за НОВА ТВ велат дека симптоматично е што единствено разузнавач од српската агенција бил загрижен да види државјани од неговата земја дека учествувале во инцидентите. Досега не е забележано присуство на ниту еден друг разузнавач од друга земја.

Според „Виенската конвенција за дипломатски односи“, дипломатите имаат имунитет и привилегии, но и обврска да ги почитуваат законите во земјата во која што се акредитирани.

„Сите лица кои уживаат привилегии и имунитети должни се да ги почитуваат законите и прописите на државата на која се акредитира. Тие, исто така, должни се да не се мешаат во внатрешните работи на таа држава“, пишува во конвенцијата.

„Сите службени работи со државата кај која се акредитира, мора да се водат со Министерството за надворешни работи на државата кај која се акредитира или со негово посредување, или со некое министерство за кое е договорено“, е наведено понатаму во конвенцијата.

Во случајот  на Живаљевиќ тоа е Министерството за внатрешни работи. Тоа значи дека доколку Живаљевиќ побарал информација од МВР за активности на српски екстремисти за време на инцидентите во Собранието, министерството е должно тие да му ги достави. Но, Живаљевиќ тоа не го сторил и на своја рака влегол во Парламентот, објаснуваат за НОВА ТВ безбедносни експерти.

Белград во одбрана на Живаљевиќ

Инаку, денеска српската амбасадорка во Скопје, Душанка Дивјак Томиќ, беше повикана во МНР за да објасни што барал нејзиниот советник Горан Живаљевиќ во Собранието на 27. април. По разговорот на амбасадорката со директорот на Директоратот за билателерални односи со земјите од Југоисточна Европа при МНР, Горан Тефчевски, МНР не побара отповикување на Живаљевиќ.

Претходно српскиот премиер Александар Вучиќ и шефот на дипломатијата, Ивица Дачиќ, изјавија дека Живаљевиќ не се мешал во внатрешните работи на Македонија.

„Не извршил никакво дело, не се мешал во внатрешните работи на Македонија и затоа нема причина кој било да протестира против нас поради тоа. Негова задача е тој да не информира“, изјави Дачиќ.

Три мандати во Скопје

Дипломатската функција во Македонија ја извршува во три одделни мандати во периодот од 2005 година до денес. Одреден период ја вршел функцијата заменик директор на БИА во Белград, а како резултат на блиските релации со поранешниот српски претседател Борис Тадиќ од 1 април 2005 година бил акредитиран во српската амбасада во Скопје.

Во јуни 2006 година ненадејно бил повлечен од Скопје. По реизборот на српскиот претседател Тадиќ во март 2008 година, во текот на 2009 Живаљевиќ се враќа на истата дипломатска функција во Скопје.

Со кадровски промени во српската амбасада на 15 април 2013 година тој повторно бил отповикан од дипломатската функција и акредитиран во српската амбасада во Хрватска.

Од јули 2015 е именуван како офицер за врска на АР и УБК на РМ во српската амбасада во земјава.