Во Европскиот парламент (ЕП) во Брисел Македонија дојде, како што изјави шефот на нашата дипломатија Никола Димитров, со “охрабрувачка порака”.
Ова беше прв настап на новиот министер пред европските пратеници од Комитетот за надворешни работи на ЕП.
Пратениците, изморени од долгото назадување на Македонија, со нетрпение очекуваа да ја слушнат.
Се разбира чекорењето во место во голем дел се должи на грчката блокада и спорот со името, но, како што забележаа некои пратеници, Македонија во овој момент се уште не може да се пофали со исполнување на основните копенхашки критериуми што ја отвораат портата за старт на преговори за членство.
Димитров детално ги извести пратениците за реформите и планот 3-6-9 на Владата но тој инсистираше пред се на новата политичка волја за градење мостови на добрососедство, регионална и меѓународна соработка. Македонија ќе знае позитивно да одговори ако и се дозволи да тргне напред во ЕУ интеграцијата :
„Предолго време искусуваме ветер во лице, дадете ни ветер во грб, а ние ќе возвратиме со мирни води и плодна жетва“, изјави Димитров.
Денес во ЕП изостанаа острите критики за состојбата на македонската демократија како што во последните години најчесто можеше да се чуе. Дури и најголемите поддржувачи на Владата на ВМРО-ДПМНЕ од сестринската демо-христијанска европска партија, како Хрватката Маријана Петир или Романецот Кристијан Преда имаа пријателски обраќања оставајќи ги зад нив критките упатени на адреса на Зоран Заев поради објавувањето на “бомбите”.
За Димитров “сега е вистинското време да се препознае моментумот и ургентноста за енергичен и позитивен ангажман кон повеќе, а не помалку ЕУ интеграција со цел да ни случат добри работи, нам, на нашиот регион и на нашата Европа”.
Грчките пратеници, разоружани поради позитивниот пристап на новата Влада кон сите соседи, беа воздржани во критиките па од еден од грчките пратеници рече дека новата Влада ставила крај на острите политики кон соседите и заклучи дека во оваа нова ситуација и во Грција има добра волја за напредок за решавање на билатералниот проблем со името.
За известувачот за Македонија, словенечкиот либерал Иво Вајгл, ЕП ја дава сета своја поддршка за старт на преговори за членство и рече дека мора да се најде начин тоа да се случи во текот на 2018 година дури и ако спорот со името дотогаш не биде решен.