Вицепремиерот за европски прашања, Никола Димитров вели дека е горчливо чувството после новото бугарско вето.Тој смета дека треба повеќе да веруваме во себеси и судбината да ја земеме во свои раце.
Според Димитров, ние можеме да зборуваме и да убедуваме, но за тоа што не зависи од нас, нема логика да се нервираме.
– Не е лесно после сè што поминавме како земја во изминатиот период. Јас кога ја прочитав изјавата на Бугарија во средата како реакција на заклучоците на Советот за општи работи на ЕУ, дури и решив ден-два да не излегувам по медиуми за да ги намалам емоциите. Ние сме како актерот Бил Мареј во филмот „Денот на мрмотот“. Приказната оди така што се буди во ист ден постојано и никако да дојде утре. Конечно кога ќе се погодат сите околности на крајот, тој се буди во нов ден. Неколку години сме заглавени со историските прашања и тоа влијае на целиот регион. Никој повеќе не се возбудува од заклучоците на ЕУ, потенцира Димитров во гостувањето на емисијата „Студио 10“ на ТВ 24.