Директорката на Македонскиот народен театар (МНТ), Симона Угриновска е казнета со 15 отсто помала плата за период од три месеци за вториот дел од свечената Академија по повод Денот на албанската азбука, кога вечерта, по официјалниот дел, продолжи со прикажување на документарен филм по повод 30 годишнината од формирањето на навивачката група „Шверцери“.
Одлуката ја донесе Владата на денешната седница со образложение за направен пропуст и давање на согласност за отстапување на МНТ без писмен договор. Притоа е задолжено Министерството за култура во соодветна постапка да наложи на директорката на МНТ од организаторите на настанот да побара надомест за направената штетата за време на настанот.
Угриновска во таа прилика за Нова ТВ изјави дека „организатор на првиот дел од вечерта било Министерството за политички систем, а лице за контакт за вториот дел бил Артан Груби, актуелен пратеник од ДУИ и поранешен член на навивачката група „Шверцери“.
„Најмногу штета е причинета на ентериерот на големата сцена и фоајето. Тоа се гледа и од видеата што се достапни преку социјалните мрежи. Но, јас мора да разграничам. Во петокот имаше два настана. Проблематичен беше вториот настан, првиот не. И ова што се случи беше најавено дека е во делот на одбележување на Денот на албанската азбука. Немавме синопсис за настанот што е вообичаено и бараме да ни приложат за секој настан и никој не очекуваше такво нешто. Само ни беше речено дека ќе има проекција на документарец и толку. Ниту бевме информирани кој ќе биде како публика. Сите напори да добиеме било каква информација останаа залудни. Бидејќи мислевме дека е во рамки на првиот настан, кој мина во најдобар ред и како гостин се појави премиерот, имавме доверба“, изјави Угриновска за НОВА ТВ.
По Свечената Академија за 111 години од Денот на албанската азбука, било најавено и прикажување на документарен филм што од домаќините бил сфатен дека е во контекст на официјалниот дел на вечерта. Но, наместо тоа, салата во објектот ја исполнија симпатизери на чаирскиот фудбалски прволигаш Шкупи (поранешна Слога Југомагнат). Епилог од „претставата“ на „Шверцерите“ беше скршени даскички од украсните лајсни, исечен тапацир, скокање по столчињата и штета од близу 4.000 евра или, поточно, 3,965 евра.
„Откорнати тапацири на потпирачи на 5 столици во вкупна вредност од 125 евра, откорнати ногарки на столици од лежиште во вредност од 3.000 евра, откорнати парафети на галериите од 10 метри и од 2 метри, во вредност од 240 евра, искршени орнаменти во вредност од 200 евра, искршени 5 подни светилки и дупки на теписон од цигари. Вкупната штета е 39.65 евра“, рече Заев за настанот што ја разбранува јавноста во втората половина на ноември.
Со реакција се јави и лидерот на ДУИ, Али Ахмети кој рече дека нема ништо спорно што навивачката група „Шверцери“ прославувала јубилеј 30 години постоење во МНТ, ниту, пак, имало намера за вандализам.