ДОМ предупредува дека планинскиот масив Јакупица е изложен на систематско опустошување од сечење на шумите.
Пратеничката Лилјана Поповска, Мирослав Богдановски, Ервин Реџепагиќ и Дарко Кржовски од ДОМ беа на увид на падините на Јакупица во општина Чашка, на барање на планинари и екологисти од Велес, кои се загрижени поради уништување на животната средина.
-Веќе со години се сече и државна и приватна шума до голосек, не водејќи сметка за обновување. Животната средина е сериозно загрозена и со фрлањето отпад во реките, особено во реката Тополка, која се влева во хидросистемот Лисиче, од кој се снабдува со вода Велес, се вели во партиското соопштение.
Претставниците на ДОМ се сретнале и со градоначалникот на оштина Чашка, Горан Стојановски, со кого се разговарале за начинот за надминување на проблемите. Заеднички било заклучено дека најефикасно и одржливо решение е прогласување на Јакупица за национален парк, со што би се обезбедила трајна заштита на животната средина и услови за развој на рурален и еко-туризам.
ДОМ, заедно со НВО Вила Зора, има поднесено иницијатива за прогласување национален парк Јакупица до Министерството за животна средина пред повеќе години, на што доби и начелна поддршка, но не и конечно решение. Оваа иницијатива ќе биде обновена, очекувајќи повеќе разбирање овојпат.