Во врска со вчерашната слика во реката Вардар, кога во надојдените води како резултат на големите врнежи, се појавија стотици пластични шишиња и друг смет, Државниот инспекторат за животна средина соопшти дека надлежноста за постапување во вакви случаи е кај овластените комунални инспектори и комунални редари од општините, односно униформирани полициски службеници. Од Инспекторатот истакнуваат дека ова е резултат на сивите сметишта.
-Тука се работи за комунална дејност, бидејќи се работи за диви сметлишта (dumpsites, израз диви депонии не постои, кога се говори за депонии секогаш се мисли на оние 53 комунално-санитарни без стандарди депонии со кои оперираат ЈКП-ата), кои граѓаните ги генерираат на јавни површини по селата и градовите и кога ќе надојдат водотеците доаѓа до слики какви што гледаме по интернет, за жал. Поради состојби во комуналната сфера доаѓа до влијание врз животната средина, како на снимките со дрон со опожарувања на јавни површини, неуреденост на јавни простори насекаде во државата.
Од ДИЖС истакнуваат дека Законот за управување со отпад е прв закон хармонизиран со ЕУ законодавството од 2004 година, а децентрализацијата е започната во септември 2005 година, согласно Законот за животната средина. Но, за жал, како што укажуваат, состојбите во управувањето со отпад генерално не се на задоволително ниво и очекуваат со новиот Закон за управување со отпад кој моментно се работи од МЖСПП преку ЕУ Твининг Проект, да се изменат многу состојби, иако потсетуваат дека е потребен и голем ангажман на општините.
https://www.facebook.com/ivan.unkovski/videos/10155928807415450/