Едно починато лице, седум новозаболени и 24 излекувани пациенти е билансот на ковид-19 во земјата во изминатите 24 часа, соопшти Министерството за здравство (МЗ). Смртниот случај е регистриран во ГОБ „8 септември“ кај 70 годишен пациент од струшко Лабуништа кој бил хоспитализиран на 8 април во тешка состојба и веднаш поставен на респираторна машина.
Седумте нови случаи со коронавирус во земјава се регистрирани кај три лица во Тетово и по две од Куманово и од Кочани.
Институтот за јавно здравје (ИЈЗ), како што се посочува, регистрира 24 излекувани пациенти кои се лекуваа во домашни услови и тоа во Скопје – 4, Дебар – 4, Струмица – 1, Куманово – 1, Штип – 3, Прилеп – 3, Кочани – 5 и Тетово – 3.
Бидејќи во вчерашниот извештај на ИЈЗ е двојно евидентиран еден контролен тест на пациент од Кочани, денеска е направена исправка со што вкупната бројка на дијагностицирани пациенти со ковид-19 во нашата земја изнесува 1.231. Последната дистрибуција по градови е: Скопје – 411, Куманово – 340, Дебар – 51, Штип – 34, Прилеп – 117, Тетово – 60, Струга – 55, Велес – 59, Битола – 17, Охрид – 15, Кавадарци – 4, Гостивар – 13, Гевгелија – 4, Струмица – 2, Крива Паланка – 4, Радовиш – 4, Крушево – 3, Кочани – 28, Пробиштип – 2, Кичево – 2, Неготино – 2, Демир Хисар – 1, Македонски Брод – 2 и Пехчево – 1, потенцираат од МЗ.
Во изминатото деноноќие направени се 207 теста и тоа преку ИЈЗ – 201 и Клиниката „Жан Митрев“ – 6. Досега во земјата се направени вкупно 12.340 тестирања на Ковид -19.
На Клиниката за инфективни болести и фебрилни состојби се хоспитализирани вкупно 60 пациенти. Од нив 18 се на кислородна поддршка, а четворица се на механичка вентилација.
Во ГОБ „8 Септември“ се хоспитализирани 45 пациенти. Со потешка клиничка слика се седум пациенти, а пет пациенти се на респираторна машина.
Во Битола се хоспитализирани вкупно 13, а на домашно лекување се следат 15 пациенти. Во Клиничката болница во Штип, на болничко лекување се четири пациенти, а на домашно лекување се следат уште 19 пациенти, информираат од МЗ.