Едно починато лице, осум новозаболени и 21 излекувано е билансот на ковид-19 во земјава за последните 24 часа, соопштуваат од Министерството за здравство (МЗ). Смртниот случај е регистриран во ГОБ „8 септември“ каде почина 59 годишна пациентка од Тетово која 15 дена била во тешка состојба и на респираторна машина.
Од МЗ информираат дека Институтот за јавно здравје (ИЈЗ) денеска регистрира 21 оздравен пациент и тоа од Скопје – 8, од Куманово – 6, од Штип – 1, од Прилеп – 2, од Тетово – 1, од Велес – 1, од Кочани – 1 и од Македонски Брод – 1 .
Во изминатите 24 часа се направени 185 тестирања, а потврдени се осум нови случаи со ковид-19 и тоа во Скопје – 3, во Битола – 1 и во Велес – 4.
Согласно ова, вкупната бројка на ковид-19 дијагностицирани во нашата земја од почетокот на епидемијата изнесува 1.526, бројката на оздравени пациенти е 1.013, на починати е 86, а во моментот бројот на активни случаи во земјата изнесува 427.
Последната дистрибуција по градови е следна: Скопје – 515, Куманово – 401, Дебар – 51, Штип – 34, Прилеп – 159, Тетово – 90, Струга – 67, Велес – 81, Битола – 19, Охрид – 15, Кавадарци – 5, Гостивар – 17, Гевгелија – 4, Струмица – 2, Крива Паланка – 5, Радовиш – 4, Крушево – 3, Кочани – 31, Пробиштип – 2, Кичево – 2, Неготино – 9 (7 заболени лица од ПЕ Неготино се жители на Демир Капија), Демир Хисар – 1, Македонски Брод – 2, Пехчево – 2, Делчево – 1, Валандово – 1, Виница – 2 и Кратово – 1.
Направените 185 теста се преку: ИЈЗ – 79, преку Ветеринарен факултет – 3, преку „Авицена“ – 9, преку „Биотек“ – 33, преку Клиника „Жан Митрев“ – 27, преку „Систина“, со PCR метода, – 17 и преку МАНУ – 17. Досега во земјата се направени вкупно 17.544 тестирања на ковид-19.
Во изминатото деноноќие на Клиниката за инфективни болести и фебрилни состојби примени се 11 нови пациенти, осум од нив се префрлени од ГОБ „8 Септември“, а вкупно се хоспитализирани 41. На кислородна поддршка се 19 пациенти, а на механичка вентилација еден.
Во ГОБ „8 Септември“ примени се четворица нови пациенти, а вкупно се хоспитализирани 14. На респираторна машина се тројца пациенти, а уште четири имаат потешка клиничка слика.
Во болницата во Битола се лекуваат четворица пациенти, а на домашно лекување се следат уште двајца пациенти. Во болницата во Штип се хоспитализирани четворица пациенти, а уште тројца се следат на домашно лекување. На инфективните одделенија во Прилеп, во Велес, во Куманово, во Охрид и во Тетово се хоспитализирани 52 позитивни и суспектни на ковид-19, стои во соопштението на Министерството за здравство.