Алес Бјалијатски е истакнат белоруски активист за човекови права, кој моментално се наоѓа во затвор кој му е определен без судење. 60-годишниот Бјалијатски е основач на Центарот за човекови права „Вијасна“ (Пролет) во Белорусија, кој беше формиран во 1996 година како одговор на бруталното задушување на уличните протести од страна на авторитарниот лидер на Белорусија, Александар Лукашенко.
„Вијасна“ обезбеди поддршка за затворените демонстранти и нивните семејства, и ја документираше употребата на тортура врз политичките затвореници од страна на белоруските власти.
„Алес го посвети својот живот на промовирање на демократијата и мирниот развој на неговата родна земја“, рече шефот на Норвешкиот Нобелов комитет, Берит Реис-Андерсен, објавувајќи ги овогодинешните три добитници на Нобелова награда.
Алес Бјалијатски и претходно помина три години во затвор откако беше осуден за даночно затајување – обвиненија кои секогаш ги негираше. Тој беше повторно приведен во 2020 година по масовните протести поради наместените избори во Белорусија кои го задржаа Лукашенко на власт.
„И покрај огромните лични тешкотии, Бјалијатски не отстапи ни педа во неговата борба за човекови права и демократија во Белорусија“, рече Комитетот за доделување на Нобелова награда.
Непосредно пред неговото апсење пред две години, Бјалијатски на својата страница на Фејсбук напиша дека белоруските власти „дејствуваат како режим на окупација“. „Стотици илјади демонстранти низ цела Белорусија, а стотици се приведени.
Лукашенко – опишан на Запад како последниот диктатор на Европа – владее со Белорусија со железна тупаница од 1994 година. Тој му дозволува на рускиот претседател Владимир Путин, неговиот близок сојузник, да ја користи територијата на Белорусија за да изврши смртоносни ракетни напади врз Украина и таму да испрати руски копнени трупи и оружја уште од првиот ден кога започна инвазијата на Москва на 24 февруари.