Добредојде за амбасадорката Анџела Агелер

Ниту еден друг американски амбасадор не бил чекан со толкаво нетрпение како новоименуваната амбасадорка Анџела Агелер. За тоа придонесе нејзината најава дека ќе се залага за одговорност на корумпираните политички актери. Што да се одговори на тоа освен Very nice и со очекување на крајот на нејзината мисија да ѝ кажеме и Good job!

Политичките и медиумски кругови, а особено граѓаните на оваа земја,  повторното доаѓање во Македонија го сметаат за пресвртна точка во борбата против корупцијата. Што е пак, добар повод да констатираме дека повторно очекуваме друг да нѝ ги решава внатрешните проблеми.

Корупцијата, се разбира, не е е производ ниту на Преспанскиот договор со Грција, ниту на договорот со Бугарија, а уште помалку на Охридскиот договор, и не може на други да ја префрлиме борбата за справување и одговорноста за штетите кои ги предизвикува.

Но, бездруго е причина за оптимизам фактот што новата американска амбасадорка која е веќе на пат кон Скопје, одлично е запознаена со овдешните состојби и соодветно ги адресираше при нејзиното сослушување во политичките институции на САД.

Она што меѓутоа ја издвојува амбасадорката Агелер од претходните дипломатски претставници на Стејт Департментот во Македонија, е што веќе еднаш беше на мисија во Македонија и што освен македонскиот одлично го разбира и говори и нашиот локален „политички јазик“. Кој да си признаеме е тешко разбирлив за напредни демократии како САД.

За разлика од времето кога Агелер беше во Македонија (2010-2013), денес нашата држава е членка на НАТО, и е поблизу до ЕУ. Сите досегашни американски дипломати отприлика ги давале истите изјави кога ги пакувале куферите за Македонија – владеење на право, зајакнување на демократијата, поддршка на патот кон ЕУ и НАТО, па и борба против корупцијата, но се чини дека пораката на амбасдорката Анџела Агелер носи во себе поголема тежина.

Можеби затоа што корупцијата во македонското општество е константата која ги поврзува сегашниот и минатиот ангажман на американската дипломатка во Македонија. И затоа нејзината изјава собра аплаузи уште пред и да го почне амбасадорскиот мандат во Скопје. Тоа е досега најексплицитната, најдиректната и најотворена изјава во таа насока.

Вашингтон, меѓутоа, треба да биде свесен за високите очекувања што се создадоа во македонската јавност во поглед на тоа прашање. Болното искуство со СЈО во кое САД многу вложија, нека биде поука за сите нас дека во градењето на антикорупциската архитектура треба секој чекор да биде добро испланиран, а кадарот внимателно мониториран. И дека нова грешка може да ја намали довербата во борбата против ова зло на денешницата на кое не се имуни ниту најразвиените земји.

Но, храброста и одважноста тоа да се адресира толку отворено и експлицитно заслужува да ѝ кажеме на новата амбасадорка – Welcome back Ms. Aggeler.