Во Основниот кривичен суд во Скопје утрово продолжи судењето за случајот „Рекет“ каде што обвинети се Бојан Јовановски-Боки 13 и Катица Јанева.
Со денешното рочиште започна и изведувањето на доказите на Катица Јанева. Јавноста присуствуваше еден час, по што беше исклучена, бидејќи почнаа да се презентираат материјали од предметот „Империја“ каде што осомничен е бизнисменот Орце Камчев, кои во моментов се тајност зашто предметот се наоѓа во истрага.
По презентацијата на првообвинетиот во „Рекет“ Бојан Јовановски на 1.600 фотографии од најпознатите светски брендови како доказ дека во најголем дел облеката ја купил пред 2019 година, а не со пари од Орце Камчев, денеска второобвинетата Катица Јанева почна да ги презентира своите материјални докази против обвинението на Вилма Русковска.
На почетокот на денешното рочиште беше објавено кратко видео од гостување во емисија на Катица Јанева во поранешната 1ТВ на 29 јануари 2019 заеднотогашните обвинители во СЈО, Лиле Стефанова и Трајче Пеливанов, во кое таа вели дека е против одредувањето на најстрогата мерка притвор и нагласува дека и куќниот притвор е притвор. Според тоа што во емисијата го кажува Јанева, судот е тој што одлучува, а не обвинителот и можеле да не го прифати предлогот или не за мерка куќен притвор. Потоа како доказ го приложи Начелното правно мислење на Врховниот суд со кое ги забранува за СЈО истрагите, меѓу кои е и „Империја“, а потоа и одлуката на овој суд да го ослободи Камчев од притвор.
Дељо Кадиев, еден од адвокатите на второобвинетата во „Рекет”, Катица Јанева, посочи дека таа приход од плата на трансакциските сметки немала екстра приходи. Според Анкетниот лист, таа немала зголемен имот, а регистрирано е зголемување во кредитното задолжување. Телефонскиот апарат кој и бил одземен, всушност на наградна игра го добила нејзината сестра Лиле Делиџакова.
Таткото на Катица се лекувал во болницата на Камчев, а одбраната приложи доказ дека сметката е платена од картичката на сестра ѝ Лиле Делиџакова.
„Ова се презентира поради коментарите дадени од Ана Камчева во една од снимките објавени на ‘Ла Верита’ каде што таа вели дека татко ѝ на Катица Јанева се лекувал во ‘Систина’, а од овој доказ може да се види дека не се работи за никакво коруптивно однесување, туку дека сè е платено регуларно“, рече Кадиев.