Координација на донаторите за Западен Балкан се одржува денеска во Брисел под покривителство на Регионалниот совет за соработка (РСС), на која се присутни сите поважни учесници во економскиот развој на регионот, вклучувајќи ги и претставниците на земјите, меѓу кои и Македонија.
„Состанокот претставува одлична можност земјите приматели на помош и донаторите да разменат информации за актуелните потреби, за недостатоците и можностите за финансирање, се со цел да се завршат преземените обврски и задачи“, изјави на отворањето генералниот секретар на РСС Горан Свилановиќ.
Тој додаде дека земјите од Западен Балкан се целосно посветени на спроведување на Стратегијата Југоисточна Европа 2020 и Повеќегодишниот акционен план за остварување на Регионалниот економски простор.
Колин Волф, шефот на одделот за регионална соработка и програми за Западен Балкан при Генералната дирекција за политиката на добрососедство и проширување на Европската комисија, ја подвлече важноста од регионалната соработка која се одвива и под покровителство на РСС.
„Треба да се искористи моментот што е создаден за Западен Балкан со најновата стратегија на ЕУ за перспективите за проширување. Регионот треба да покаже дека може да работи заеднички за остварување на значителни резултати“, изјави Волф.
Координативниот состанок на донаторите се одржува само еден ден откако е потврден програмскиот документ од стратегијата за ЈИЕ 2020 за периодот 2018-2020 година.
На состанокот присуствуваат сите заинтересирани страни и корисници од регионот кои се вклучени во спроведувањето на Стратегијата ЈИЕ 2020, главните донаторски организации, билатералните донатори и други меѓународни финансиски организации и институции, соопшти РСС.