Дождот не ги спречи стотина граѓани и денеска да ги продолжат протестите под името „Протестирам“ или т.н „Шарена револуција“. Демонстрантите се собраа како и вообичаено пред Специјалното јавно обвинителство а ќе продолжи пред зградата на Јавниот програмски сервис.
„Само информирани граѓан(к)и можат да носат информирани одлуки. Задача на Македонската радио телевизија, како јавен радиодифузер, е да известува професионално и непристрасно за настаните. Меѓутоа, овој јавен сервис е оттуѓен од народот и е слуга на партиските интереси на власта. Заедно со приватните режимски медиуми, МРТВ учествува во демонизирање на критиката и е комплетно посветена на промоција на корумпираниот режим на ВМРО-ДПМНЕ и ДУИ. Со пари на граѓаните креира розова слика за реалноста и го одржува режимот на власт.
Денешниот протест, кој ќе започне во 18:00 пред СЈО, е со фокус на МРТВ. Ќе маршираме дотаму за да им порачаме дека тие се наш сервис и дека нивна задача е да работат професионално, а не партиски. Ќе им порачаме дека МРТВ е на граѓаните, од граѓаните и за граѓаните! Нема правда, нема мир! #Протестирам #Protestoj“ се вели во повикот на социјалните мрежи.