Напаѓачот на џамиите во Крајстчрч, Брентон Тарант е осуден на казна доживотен затвор, без можнoст за условна слобода, за убиство на 51 муслумански верник во 2019 година на Нов Зеланд. Судијата Камерон Мандер рече дека зад Тарантовата „изопачена“ идеологија се крие „силна омраза“ која го навела да нападне мажи, жени и деца кои не можеле да се бранат.
„Задача на судот е одлучно да се сузбие тоа зло на омраза“, рече судијата Мандер изрекувајќи ја казната, која е прва таков вид во судската пракса на Нов Зеланд.
Судијата, потенцирајќи дека новозеландската муслиманска заедница платила висока цена, рече дека сторителот на страшниот масакар, сепак, не успеал да ја промовира идеологијата на крајната десница.
„Бевте свиреп и без милост. Вашиот чин е нечовечки“, рече судијата.
На 15 март во 2019 година, Брентон Тарант ладнокрвно уби 51 верник за време на петочна молитва во две џамии, поттикнувајќи бран на осуда низ целиот свет. Тој е прогласен за виновен за 51 убиство, 40 обиди за убиство и за терористички напад, откако во март ја призна вината.
Главниот обвинител Марк Зарифех оцени дека таков масакр „не е запомнет во историјата на злосторства на Нов Зеланд“.
„Ова несомнено е најлошото убиство на Нов Зеланд (…) мотивирано цврсто од вкоренета расистичка и ксенофобна иделологија“, рече тој
Доживотен затвор е „единствената соодветна казна“ за Тарант, заклучи Зарифех.