Преку седум јавни огласи на располагање ставени се вкупно 13.758 хектари државно земјоделско земјиште, за обработка на житни култури, за подигнување на долгогодишни насади и за производство на сточна храна, велат од Министерството за земјоделие, водостопанство и храна.
Овие парцели земјоделско земјиште се распоредени низ целата територија на државата со површини до и над три хектари.
Со тоа, секоја педа обработливо земјиште се става на располагање на земјоделците, за да се зголеми домашното производство и да се намали зависноста од увоз, велат од Министерството.
За да им се излезе в пресрет на земјоделците во овие комплицирани времиња, се дава поддршка за набавка на вештачко ѓубриво, со што на земјоделците им се компензираат трошоците и до 40отсто. Парите за оваа поддршка земјоделците ги добиваат брзо во рок од 7 денови по аплицирањето.
За оваа мерка до сега исплатени се вкупно 86 милиони денари за 5.475 земјоделци.
Преку ребалансот на буџетот кој е изгласан во Собранието, се обезбедени дополнителни 3,2 милијарди денари за директна поддршка на над 45.000 земјоделци.
Овој земјоделски буџет има за цел расчистување на сите заостанати обврски кон земјоделците, а езапочната и авансна исплата на субвенциите во рок од 90 дена по аплицирањето.
Овие чекори ги поздрави и владејачката СДСМ. „Ова се конкретни, навремени и ефикасни мерки за помош и поддршка на домашното земјоделско производство“ беше речено на денешната прес-конференција. (Р.Н.)