Македонската Информативна Агенција (МИА) својата прва вест ја лиферуваше на денешен ден (30 септември) во 1998 година и оттогаш што почна со редовна продукција на информации за медиумите и граѓаните во Македонија, во прво време со фотографии и текст, а денес и со видео преноси во живо, целосен мултимедијален израз и присутност на социјалните медиуми.
МИА е јавен информативен сервис, основан од Собранието на Република Македонија во февруари 1992 година. Својата работа ја почна со дваесетина новинари, а денес има 102 ангажирани лица, новинари, дописници, сниматели, фоторепортери, стручни служби и логистика, хонорарни соработници од државава и од странство.
Согласно мултимедијалната функционалност, МИА своите информации, дневните настани, авторските текстови – интервјуа, теми, стории и анализи и преноси во живо ги објавува на својата интернет страна и Јутјуб каналот на МИА, како и преку директно емитување на видеа на нејзината веб страна и профилот на Фејсбук , Инстаграм и Твитер. Агенцијата има потпишано договори за размена на вести и медимски продукти со сите државни агенции во регионот, како и со повеќе приватни агенции од соседството.
МИА, исто така, е дел и на информативните пулови на: „Дојче веле“ (Германија), „Слободна Европа“, „Гласот на Америка“, СТА (Словенија), ХИНА (Хрватска), БТА (Бугарија), АНА-МПА (Грција), АТА (Албанија), „Анадолија“ (Турција), АПА (Австрија), ЕФЕ (Шпанија) МИНА (Црна Гора), ФЕНА и СРНА (БиХ), „Агерпрес“ (Романија), „Танјуг“ (Србија), ФОНЕТ (Србија), БГНЕС ( Бугарија), „Укринформ“ (Украина), а соработува и со големите новински агенции – Европската фотоагенција ЕПА, германската ДПА, британскиот јавен сервис „Би-Би-Си“, кинеската Ксинхуа, руската ТАСС, корејската Јонхап, итн.
Во интерес на медиумската писменост, МИА започна и сопствена агенциска школа за новинарство преку која го дава својот придонес за медиумска писменост и обуки за помлади новинари од другите медиуми како и студенти од факултетите кои сакаат да влезат во новинарската професија.
Школата стартуваше на 26 февруари минатата година и тогаш околу 30 искусни новинари од Агенцијата и други медиуми, новинари почетници, но и студенти по новинарство се обучуваа за покривање теми поврзани со Европската Унија, политиките на ЕУ, процесот на преговори на земја кандидат.
МИА е членка на ABNA – Асоцијација на новинските агенции на земјите од Југоисточна Европа и на Црноморската асоцијација на национални новински агенции – BSANNA.