Државниот завод за ревизија (ДЗР) изврши ревизија на финансиски извештаи заедно со ревизија на усогласеност на Фондот за здравствено осигурување за 2021 година.
Како клучни системски слабости, притоа, го посочува тоа што за три години од граѓаните во приватното здравство, само со ПЦР тестови, се прелеани најмалку 19,9 милиони евра.
Во ревизорскиот извештај се наведува и дека не е ажурирана Листата на лекови кои паѓаат на товар на Фондот како и тоа дека во 2021 година е реализиран значајно помал обем на услуги од договорениот надоместок, поради што 106 од вкупно 116 здравствени установи имаат добиено статус на неодржливи.
Цел на ревизијата, како што велат од ДЗР, е да се добие претстава за реалноста на финансиските извештаи како и дали активностите и трансакциите се во согласност со законската регулатива.
Ревизорите утврдиле слабости во спроведувањето на интерните и теренските контроли при потврдувањето на објективноста на фактурираните услуги.
„Ревизорите констатираа слабости во контролите при препишување и издавање лекови, непочитување на роковите при вршењето на контролите и изрекувањето на казни, поради немање контроли исплатувани се надоместоци за боледување и кога осигурениците добивале плата, велат од Државниот завод за ревизија.
Како клучни препораки ДЗР предлага воспоставување систем на планирање, следење и редовно вршење контрола на видот и обемот на извршените здравствени услуги и издадени рецепти.
Дел од препораките се и доуредувањето на постапката и воспоставување контроли при исплатата на надоместоците за боледување и зајакнување на контролите кај условниот надоместок.
Воедно ДЗР искажа и резерва во однос на вистинитоста и објективноста на финансиските извештаи и за усогласеност на финансиските трансакции со релевантната законска регулатива за 2021 година.