Демократскиот сојуз најавува учество на парламентарните избори кои ќе се одржат на 11.декември оваа година, укажувајќи дека нивната коалиција за ПРОМЕНИ и ПРАВДА е отворена за сите кои сакаат да го победат злото, криминалот, корупцијата и да им ги вратат украденото на граѓаните , и оние кои сакаат да гласаат и да се изборат за пристоен и достоинствен живот за сите, а не само за поединци.
Демократскиот сојуз подготви Изборна Програма „ПРОМЕНИ, ПРАВДА, ПРОГРЕС“, во која се вградени голем број на идеи од граѓанските организации кои подготвија предлог на итни демократски реформи.
– По вчерашниот договор за одржување на предвремени избори, граѓаните ќе имаат можност да се ослободат од сите тие кои Македонија ја ограбија и ја вовлекоа во длабока криза. Овиe лидери на четирите партии, не ја прифатија определбата на мнозинството граѓани, и Македонија да биде една изборна единица, но и покрај сé, ние го прифаќаме граѓанскиот предизвик и на изборите ќе одиме за да се случат промени и правда, а граѓаните да ја искористат последната шанса за да се ослободат од криминалците кои Македонија ја држат во заложништво и да го вратат тоа што им е украдено, се вели во соопштението на ДС.
Оттаму велат свесни се дека власта не спроведе суштински реформи за да има фер политички натпревар и можност партиите да ги презентираат своите платформи и проекти за излез од кризата но дека последните сондажи на јавното мислење ја покажуваат цврстата решеност на граѓаните од корен да се променат работите и да дадат шанса државата да ја водат способни и чесни кадри.
Демократскиот сојуз ги повикува политичките партии, граѓански асоцијации, поединци и сите други кои се за промени да се здружат во Коалицијата за Промени и Правда и да покажат единство и гаранции на граѓаните дека се можни промени.
Во оваа коалиција засега активни учесници се Демократскиот сојуз, ФРОДЕМ, МОРО- РП и ДЕМОС.