Државниот санитарен и здравствен инспекторат ги доби резултатите од контролите за гостилницата „ДМ“ каде неодмна имаше труење со храна, според кои оваа позната скопска кафеана ќе може повторно да работи, соопшти директорката на Инспекторатот Ирина Сотирова Бухова.
На прес- конференцијата таа истакна дека институцијата цврсто стои на своите одлуки дека нема да потклекне на какви било притисоци и закани за да измени свои извештаи, па дури ако од тоа го побараат лица кои, кои како што рече „имаат моќ и власт“.
– Државниот санитарен и здравствен инспекторат нема да амнестира ничии пријатели и роднини, кои би го загрозиле здравјето на населението. Здравјето на граѓаните нема да биде ставено на цена да се купува, рече Сотирова Бухова, не сакајќи да открие дали имало притисоци и закани за случаите кои се појавија во јавноста за труење со храна.
На прес конференцијата, директорката на Инспекторатот истакна дека располагаа со мал број инспектори, дека поголем број од нив се на возраст од 54 до 67 години и дека во следните години ќе останат само со десетина и дека располагат со амортизирани возила од типот „југо“.
Најави дека ќе побара барем во секој град да има по еден вработен санитарен и здравствен инспектор во прво време и оти исто така ќе биде побарана корекција на законската регулатива.