Министерот за правда Никола Тупанчески со серија изјави утринава го поплави тајмлајнот на порталите и на агрегатите за вести, во обид да се оправда за одењето во Палермо и за јавната оцена на американската амбасадорка дека довербата во македонската судство е само 8 проценти.

Министерот вели дека е шокиран од јавната осуда и дека платил авионски билет на чартер летот за Палермо, потенцирајќи притоа и дека ниту една законска и етичка норма не е прекршена. За министерот не е спорно што јавноста за неговата спортска екскурзија во славниот град Палермо дозна кога беше објавена фотографија од трибините на која се гледа како тој во придружба на обвинителката Фатиме Фетаи и судијата Лазар Нанев, навиваат за нашата репрезентација. Не е спорно ни што заминал со чартер лет на кој не се наплаќаат билети, а излегува и дека не му е спорно ни што тој како претставник на извршната власт е во патувачка шема со судија и обвинител.

Јавноста притоа со право постави прашање дали тие платиле за летот до сицилијанскиот град, и дали министерот на пример бил однесен до аеродромот и назад со службен автомобил и со службено обезбедување. На тоа прашање логично е да додадеме уште едно прашање дали овие ВИП личности го користеле аеродромскиот ВИП салон и кој ја платил цената за тоа која не е мала.

Тројцата набрзина дадоа одговор дека платиле билети, иако праксата на организирање чартер летови од страна на Фудбалската федерација не е од вчера и сите познавачи кои ги консултиравме велат дека е мала шансата тие да платиле.

Во ред, никој нема да им бара доказ, иако е чесно самите да го приложат, кога веќе толку самоуверено тврдат дека платиле.

Подударноста што оваа афера е поврзана со Палермо – град прочуен по мафијашка историја уште повеќе дава простор за паралели. Овој град е познат по тоа што многу судии и обвинители ги положија своите животи во борбата со мафијашките кланови, и токму духот на Палермо требаше да го потсети министерот и неговата судско-обвинителска свита дека се обврзани на чесност и транспарентност, и дека јавноста со право ќе им бара одговори.

Освен прашањето за (не)платените билети, заслужува одговор и прашањето за независноста на судската власт од извршната, и спрегите меѓу овие две власти кои три децении спречуваат државата да изгради ефикасен и непристрасен судски систем.

Ако министерот Тупанчески, како што рече во неговото интервју утринава, смета дека се потребни радикални мерки за да се смени перцепцијата на граѓаните и ниската доверба во судството, најрадикално е да поднесе оставка после оваа екскурзија во друштво на судија и обвинител. Потранспарентен доказ за поврзаноста на судската и извршната власт -здравје!

Ќе биде иронично, секако, што во Палермо каде низ историјата се тркалаа судски и обвинителски глави во борба со мафијата, Македонија ќе истркала (политички) една министерска глава поради авиобилет и погрешен избор на друштвото. Но тоа е, секој со својата историја. Истото важи и за Фетаи и Нанев, бездруго.

Соња Крамарска