Лидерот на Демократската Унија за Интеграција (ДУИ), Али Ахмети за попладнево (15 ч.) свика Централно претседателство на партијата. Седницата, како што информираат од коалициониот партнер во Владата, ќе се одржи во партиското седиште во Мала Речица. На седницата ќе се говори околу четвртиот изборен конгрес на ДУИ, идните програмски определби и статутарни промени, се наведува во соопштението од партијата.

Извори од таму наведуваат дека на се исклучува можноста да се разговара и за темата која деновиве ја потресе политичката сцена и целокупната јавност – иницијативата за разгледување на уставноста на членот 11-а од Законот за помилување со што се отвора можност за амнестија на сите инволвирани во случаите на СЈО меѓу кои има и членови на ДУИ. Претходно, од партијата неофицијално кажаа дека на оваа тема ќе се консултираат со домашни и меѓународни правни експерти.