„Постигнавме добар успех. Лекот е веќе доставен во 15 земји“, изјави неодамна Кирил Димитриев, раководител на Рускиот фонд за директни инвестиции (РДИФ) за руската телевизија.
Сега фактички постојат само два антивирусни препарата кои се доставени во ограничен број на земји – американскиот „Ремдесивир“ и рускиот „Авифавир“.
„САД купија 90 отсто од „Ремдесивир“. Оттука, не нè’ чуди што 15 земји го купуваат нашиот лек“, вели Димитриев. Меѓу другите, има седум земји од Латинска Америка и Јужноафриканската Република.
Руските власти на крајот на мај дадоа дозвола за лек со име „Фавипиравир“. Тој е резултат на заедничката работа на РДИФ и фирмата „Кимрар“ од рускиот град Химки. Составот се базира врз јапонски лек против грип со исто име – Фавипиравир, кој е познат под трговската марка „Авиган“.
Во Русија јапонскиот лек е „малку модифициран“, објасни Димитриев на средба со рускиот претседател Владимир Путин. Во јуни, руските клиники првпат го добија препаратот против Ковид-19 произведен во Русија под трговското име „Авифавир“. Тој во медиумите е опишан како „руски лек против коронавирусот“.
Рецепт од Јапонија
„Фавипиравир“ (Авиган) доби дозвола во Јапонија во 2014 година како средство против грип, но со ограничувања. Примената е дозволена кога се работи за нови вируси на грип, но и во случаи каде други лекови веќе не делуваат, значи како последно средство.
Западните медиуми јавуваат дека постапката за добивање дозвола била тешка и траела три години, поради тоа што како несакан ефект се јавувале и аномалии кај новороденчиња. Затоа бремените жени и оние кои дојат, не смеат да го земаат лекот.
„Фавипиравир“ блокира размножување на низа вируси. Меѓу другото, се употребуваше и против ебола вирусот во Африка. Медицинарите го опишуваат и како јапонска верзија на „Ремдесивир“, лек против ебола регистриран во САД, кој важи за надежен и во третманот на болни од Ковид-19.
Пред коронавирусот, „Авиган“ во Јапонија не беше конкуренција за другите средства против грип. Лекот го немаше во слободна употреба, туку по налог на владата беше произведуван само како резервно средство во случај на пандемија. Од февруари во 2020 година тој во јапонските клиники се употребува за третман на пациенти со коронавирус. Јапонските медиуми тврдат дека лекот делува добро кога се работи за благ тек на болеста. Во тешките случаи, како што се вели, речиси и да немал дејство.
Германија купува резерви
Јапонија ни оддалеку не е единствената земја во која против короната се употребува „Авиган“. Отприлика 40 земји, вклучително и Германија, од април годинава во клинички студии го употребуваат овој лек, заедно со други надежни лекови против Ковид-19.
Министерството за здравство на прашање на „Дојче Вече“ соопштува дека се купени околу 260.000 таблети „Авиган“ за третман на тешки болни од Ковид-19 во случај на нов корона-бран.
„Фавипиравир“ се произведува и во Кина и се применува против коронавирусот во клинички студии. Германскиот виролог Кристијан Дростен од берлинската клиника „Шарите“ укажува дека на пациентите им е дадена „енормна концентрација на супстанцијата“. Истовремено тој предупредува од несакани дејства, кои упатуваат на акутен проблем со бубрезите. Оттука, под знак прашалник е долгорочна примена на лекот.
Претпазлив оптимизам
„Фавипиравир“ ветува во борбата против Ковид-19 и може да се спореди со „Ремдесивир“, оценува Хелмут Хан, претседател на германско-рускиот форум „Кох-Мечников“.
„Добро е што има средство, но нема формален доказ за неговата ефикасност според нашите критериуми“, нагласува Хан.
Според Хан, лек со ваква супстанција во Германија сè уште не може целосно да се применува, поради тоа што не постојат опсежни научни податоци.
„Разбирливо е доколку Русија веќе сега го употребува ова средство за лекување на голем број пациенти“, вели Хан.
Тој тоа го објаснува со големиот обем на проблемот со короната во Русија и неопходните мерки кои мора да се преземат. Освен тоа, во Русија, „контролите и прописите“ не се толку строги како во Германија, нагласува тој. Тоа важи како за клиничките студии, така и за давањето дозвола за лекови. „Но, тоа не значи дека едното е подобро од другото“, додава Хан.
