Сите биле на болничко лекување поради воспаление на мозокот.
Евидентирани се три случаи на западнонилска треска во Македонија во август, кои резултирале со воспаление на мозокот. Станува збор за две деца и едно повозрасно лице, објавува Институтот за јавно здравје во својот најнов извештај за месец август.
Сите заболени биле хоспитализирани во болница поради воспаление на мозокот.
Според извештајот, вирусот на западнонилска треска бил лабораториски откриен кај 8-годишно девојче од Струмица, 11-годишно момче од село Враниште, струшко и 69-годишен маж од Стајковци.
– Во однос на трите случаи на вирусен енцефалитис, лабораториски е потврдено дека истите се предизвикани од West Nile вирус. Двете деца биле хоспитализирани на Клиниката за детски болести во Скопје, а возрасното лице се лекувало на Клиниката за неврологија во Скопје. Направени се епидемиолошки истражувања за трите случаи, известени се соодветните Центри за јавно здравје и преземени се соодветни превентивни мерки – се вели во извештајот.
Од Институтот за јавно здравје смируваат:
– Случаите на западнонилска треска меѓусебно не се поврзани, па оттаму нема потреба за страв кај населението – велат од ИЈЗ.
Луѓето најчесто се заразуваат по каснување од заразен комарец. Болеста не се пренесува од човек на човек, но вирусот може да се пренесе преку трансфузија на крв и трансплантација на органи.
Епидемиолозите од ИЈЗ појаснуваат дека инкубацијата трае од 3 до 14 дена, а околу 80 отсто од инфекциите кај луѓето поминуваат без симптоми. Останатите 20 отсто симптоматски инфекции најчесто се манифестираат како треска која поминува сама од себе, а помалку од 1 отсто од инфекциите со западнонилска треска кај луѓе се развиваат со тешка клиничка слика и се потенцијално смртоносни (на пример, воспаление на мозокот, воспаление на мозочните обвивки или парализи).
Нема специфична терапија за ова заболување, а третманот е симптоматски.
(Љ.Б.)