Основното јавно обвинителство води истрага за девет лица кои се инволвирани во случајот со Тамара Димовска, девојчето кое почина во февруари минатата година чекајќи да добие согласност за лекување во странство.
Скоро две години по смртта се уште не е покренато никакво обвинение. Од ОЈО информираат дека во предметот за смртта на Тамара биле превземени голем број потребни дејствија за расветлување на причинско последичната врска која придонела за настапување на смртта кај детето.
„При тоа се водеше постапка против девет лица чии адвокати по извршениот увид во доказите доставија предлог за прибирање на нови докази. Надлежниот јавен обвинител, согласно законската процедура ги превзема потребните дејствија за прибирање на дополнителните докази, по што по нивно севкупно разгледување и анализа ќе донесе јавно обвинителска одлука,“ соопштуваат од ОЈО.
Од Обвинителството велат дека се повикуваат обвинетите, се прибираат докази од нивните адвокати. Кога ќе заврши оваа постапка ќе се знае против колку луѓе ќе биде покренато обвинение , велат од обвинителството. Не се знае против кого се се води истрага, од ОЈО не откриваат детали. Случајот скоро две години е заглавен во обвинителството. Тамара почина како резултат на институционална негрижа, чекајќи да добие одобрение за операција во странство. Нејзината мајка Жаклина Димовска вели дека освен иисказот што го дала пред истекот на минатата година досега ниту билоа повикана ниту ја известиле за текот на истрагата.
„Се дознавам од вас новинарите. Никој досега не ме побарал ниту ме извесил нешто од обвинителство. Почнав да губам надеж, случајот скоро две години тапка во место, јас не знам до кога вака“, изјави за НОВА, Жаклина Димовска, мајка на починатата Тамара.
И покрај тоа што мајката на Тамара има право да знае до каде е истрагата таа досега ниту еднаш не била повикана во обвинителството, велат во Хелсиншкиот комитет за човекови права. Од таму потенцираат дека се поминати сите законски рокови во Законот за кривична постапка и системот се покажал како неефикасен. Токму поради овие причини Хелсиншкиот комитет за случајот со Тамара, подготвува апликација до Судот за човекови права во Стразбур.
И покрај многуте граѓански акции на кои се повикуваше на оставка и одговорност, од функцијата си замина само директорката на ФЗО, Маја Парнаџиева Змејкова. Министерот Тодоров тогаш изјави дека бил разочаран , но дека не чувствувал одговорност за смртта на девојчето.