Организацискиот секретар на Нова социјалдемократска партија (НСДП), Кристијан Трајковски на денешниот Конгрес на кој партијата треба да избере наследник на Тито Петковски, не се самокандидираше како што најавуваше во претходните денови.

„На денешниот, петти конгрес на НСДП, видовме дека Горан Мисовски продолжи со своите намери да им го одземе правото на слободен избор на делегатите на НСДП спротивно на Статутот на НСДП, Правилникот за кандидирање и избор на Претседател на НСДП спречи демократски натпревар на идеи за иднината на нашата партија“, вели тој.

„Видовме како, спротивно на сите акти на НСДП, тие извршија насилнички и измамнички инженеринг на составот на делегатите, фалсификувајќи ги списоците и менувајќи ги имињата утврдени од Извршните Одбори на Општинските организации. На место на легитимно избраните делегати се ставени цели фамилии, брачни другари и слични групи лојални на Горан Мисовски“, тврди Трајковски.

Тој додава дека противничкиот табор се служел со сите можни притисоци, закани и празни ветувања за да ги добијат делегатите кои не можеа да ги наместат.

„На крај видовме како, извршителите на Горан Мисовски го киднапираа работното претседателство и органите на овој Конгрес и како по секоја цена се подготвени да му помогнат на човек кој нема поддршка од мнозинството, преку прекршување и злоупотреба на Статутот и процедурите, да ја киднапира нашата партија и да го уништи сето тоа што сите ние го градиме седумаесет години“, обвини Трајковски.

За жал, легитимитетот а и изборот на следниот Претседател на НСДП е целосно урнисан и Мисовски и неговите приврзаници ги уништија сите услови за слободно, фер и демократско изјаснување на делегатите во постапка согласно Статутот и актите на НСДП, се вели во реакцијата што Трајковски ја испрати до јавноста.

„Овој Конгрес е фалсификуван и секоја одлука која ќе биде донесена од овој состав на делегати е нелегитимна“, вели тој.

Сега единствен кандидат за претседател на НСДП останува собранискиот потпретседател Горан Мисовски.

Конгресот се одвива во тензична атмосфера на која и претходеа меѓусебни обвинувања на двете партиски струи. Другата струја зад која се тврди дека во сенка стои досегашниот партиски ветеран и екс лидер Тито Петковски, обвини дека Горан Мисовски не е легитимен кандидат, бидејќи е номиниран на централен одбор на кој била донесена одлука со кандидати да се почека до следен партиски состанок.