Од 7.532 кандидати пријавени за попишувачи, 3.251 кандидати се вакцинирани. Од останатите 4.281 невакцинирани кандидати, 2.435 прифаќаат да бидат вакцинирани доколку им биде организирано тоа.
Вака некако изгледа вакциналната ,,слика“ на пријавените за попишувачи на претстојниот Попис, кои покрај за основните лични податоци во прашалниците одговараа и на прашањата дали се вакцинирани или не и дали би сакале да се вакцинираат, ако не се.
– Во контакт сме баш сега со Министерот за здравство, како е најдобро да го организираме вакцинирањето на оние кандидати кои пројавија интерес за тоа а кои ќе ја поминат селекцијата за попишувач. Според мене тоа би било најдобро да се направи на местата на обуката, која почнува во недела на 29.08 и е предвидено да трае 3 дена. Обуките ќе се организираат во училиштата по што ќе бидат дезинфицирани и целосно подготвени за почеток на учебната година од први септември, изјави за НоваТв , Директорот на ДЗС, Апостол Симовски.
Симовски, во разговорот за НоваТв, рече оти очекува од овој број на пријавени кандидати за попишувачи, без малку 8.000, и со проверката, да излезе солиден број на луѓе кои би учествувале во статистичката операција. Единствено што е енигма сеуште, вели тој, дали има пријавено урамнотежен број по региони во државата и ако не, тогаш се знае каде прво ќе се обратиме, изјави Симовски, алудирајќи на вработените во јавната администрација.
М.Т.