Јас сум заменски обвинет во измислено и конструирано обвинение со измислена одговорност за замајување на јавноста и сум единствен во Македонија кој уште во 2012 година, кога се отворила кобната дискотека „Пулс“ сум реагирал и сум побарал да не се издава лиценца.
Ова сумирано во воведните зборови го кажа поранешниот градоначалник на Кочани и бизнисмен Ратко Димитровски во воведните зборови пред судот и побара обвинителството да го повлече обвинението против него за како што рече да не се прават „нови неправди“.
Во оваа ситуација во која ме посочуваат како обвинет јас не наоѓам маана во тој што не разбира ниту пак на тој што е во болка. Не му е работа да знае и да чита закони, наоѓам маана и вина кај тој што треба да го знае законот и да го спроведува, а не го прави тоа. Наоѓам маана во тој што треба да ги разбира основните цели на децентрализација и разликување на државни, централни од локални ингеренции. Во ситуација кога државата има ингеренции, неделегирајќи одговорност на локалните власт, во овој случај целокупната постапка требало да ја спроведат Министерството за внатрешни работи и Државниот пазарен инспекторат за да испитаат дали се исполнети условите, рече Димитровски.
Тој всушност тврди дека локалните власти немаат никаква одговорност да проверуваат дали некој угостителски објект е безбеден бидејќи тие ингеренции се на државните органи односно тоа го проверуваат Министерството за внатрешни работи и Државниот пазарен инспекторат врз основа на чии информации потоа Министерството за економија издава лиценца за некој локал.
Со ваквото постапувања на Јавното обвинителство испаѓа дека јас требало да постапувам надвор од закон, да ги преземам улогите на МВР, ДПИ, на Јавното обвинителство кои се единствените органи кои треба да знаат буквално се што се случува во државата за да се спречи било какво нарушување на безбедноста. Тоа всушност е нивна надлежност, рече Димитровски.
Тој прво го изрази своето сочувство кон блиските на загинатите за загубата на животите на негови соседи, роднини.
Изненаден сум и никогаш, ама баш никогаш не би можел да замислам дека ќе застанам на обвинителна клупа за такво нешто за кое ме обвинуваат сега, а единствено јас сум бил тој што бил против отворање на дискотеката пред 13 години. Свесен сум, знам дека иако сум стопанственик целиот мој живот луѓето ме препознаваат како политичка фигура бидејќи во кандидатурата бев поддржан од партија и бев пратеник од истата партија. Не очекував дел од моите сограѓани да се оградат од мене како политички лик, но никако не е во ред и е сосема е неправедно да ме гледаат со презир да ме гледаат како човек кој има и минимално учество било каков придонес во трагедијата од невидени размери. Оваа конструкција од обвинение секако е на моја штета, на штета на моето семејство, но најмногу на штета на оние кои засекогаш ќе тагуваат. Ова го велам затоа што и јас како и тие сакаме правда прво за нивните најмили, а потоа за цело Кочани, а каква права и сатисфакција може да се добие доколку се обвинуваат луѓе кои не се виновни и каква правда може да се добие ако се изостави само еден човек кој има вина, а не е обвинет. Едно треба да е јасно на сите нас овде. Не постојат заменски обвинети, не може некој невин да го замени местото на некој што треба да одговара и тоа сериозно да одговара пред Законот, порача поранешниот градоначалник.
Тој цитираше документ односно барање кое го испратил уште во 2012 година до Министерството за економија во кое бара да не биде издадена лиценца на сопственикот Дејан Јованов – Деко за дискотека или диско клуб откако тој му побарал дозвола за паркинг пред дискотеката, бидејќи според Деталниот урбанистички план на тоа место не била предвидена изградба на дискотека, туку објектот имал намена за лесна индустрија и јавниот паркинг кој е пред неа можел да се користи само за објект за лесна индустрија, а не за дискотека.
Според обвинението, тој се товари дека не постапувал според Законот за локална самоуправа, па иако бил должен за почитување на деталниот урбанистички план за Кочани и знаел дека кабарето е безбедносно опасно , не презел службени дејствија за утврдување на неправилности и затворање на објектот.