Професорката на Електротехничкиот факултет во Љубљана, Емилија Стојменова Дух е словенечка државјанка, но и Македонка од Виница која доби министерско место во новата влада на Словенија. Стојменова во меѓупериодот додека владата во Љубљана да почне официјално со работа, што се планира за почетокот на јуни, за НоваТВ ги изнесе своите први импресии од добивањето на поканата од новиот премиер Голоб да влезе во неговиот тим, но и за тоа дали е лесно да се биде жена во политиката, било каде, па и во Словенија.
Таа вели дека во ниту една земја не е лесно жена да се искачи толку високо во политиката.
„Со новата влада во Словенија добивме прва женска претседателка на парламентот. Воопшто жените имаме проблеми да се искачиме на високи позиции. На пример, јас сум прва жена вонредна професорка на катедрата во Љубљана. Заедно со уште три колешки, Марта Кос, Матеја Малнар Штембал и Наташа Пирц Мусар, со желба да го смениме тоа, минатата година го основавме здружението Ona Ve (Таа zнае), со цел да покажеме дека Словенија има многу успешни жени и дека заслужуваме свој простор на водечките позиции во општеството. Со оглед на составот на новиот парламент и владата, оценувам дека сме успешни“, вели Емилија Стојменува Дух, во разговор за нашиот портал.
Во идната влада, вели, ја поканил идниот словенечки премиер Роберт Голоб како експертка во полето на дигитални технологии. Нејзиното искуство и пред се визија за дигитална трансформација на државата го убедило дека токму таа е вистинската личност за таа позиција.
„Со оглед на тоа дека сме и двајцата вонредни професори на Факултетот за електротехника, мојата работа и проекти ги познаваше од порано. Поканата да станам министерка во Владата на премиерот Голоб морам да признам дека ме изненади. Особено затоа што не сум член на неговата партија. Поканата беше добиена исклучиво врз основа на мојата мината работа. Покрај тоа, родена сум во друга држава. Во цела Европа сме само три такви министерки. Една во Шведска, една во Австрија и сега јас“, појаснува Стојменова Дух.
Нејзиното презиме Дух го добива по брачна линија од сопругот кој има мешано потекло од Словенија, Чешка и Германија. Како што дополнува Стојменова, тој е нејзината најголема поддршка бидејќи во неа верува и тогаш кога самата се сомнева. За Македонија има големо место во срцето, како и за фамилијата, роднините и пријателите.
„Последен пат бевме сите заедно со сопругот и синот во Македонија во декември 2019. Само што се вративме од едно далечно патување имав некое чувство дека мора, макар за викенд да ги посетиме моите родители. Два месеца после тоа се случи пандемијата со ковид и од тогаш немаме дојдено. Најмногу ми недостасуваат родителите, роднините и пријателите. На моја голема среќа во Словенија живее и сестра ми и барем малку ми олеснува дека не сум сосема сама“, вели Стојменова Дух.
Според неа Словенија има огромна покриеност со интернет но недостасува регулатива за дигитализација.
„Словенија е добро покриена со интернет. Деловите кои не се, ќе бидат до крајот на 2025 година. Покрај тоа, голем дел од јавните сервиси се достапни онлајн. Еден од главните проблеми се дигитални знаења и компетенции. Околу 60 отсто Словенци имаат само основни знаења и компетенции и така не можат да ги искористат сите предности кои ги нуди дигиталната трансформација. Недостигаат правни основи за дигитализација. Тоа ќе биде еден од нашите главните приоритети“, појаснува професорката Емилија од Македонија која ќе биде министерка во новата влада на Словенија. (С.К.-М.Т.)