Празникот на фудбалот со Светското првенство што се отвори во Русија треба да биде добра можност да се размисли за промени и почитување на човековите права во оваа земја, реагираа преку заедничката изјава, претседателот на Комисијата за надворешни работи на Европскиот парламент (ЕП) Дејвид МекАлистер, претседателот на Поткомитетот за човекови права Пјер Антонио Панцери и претседателот на делегацијата на ЕП за парламентарната соработка меѓу ЕУ и Русија, Омар Карас.
Во ова заедничко соопштение тие велат дека состојбата со човековите права во Русија е “негативна”, “вклучително и за време на подготовките за Светското првенство во 2018 година”. Во Русија и понатаму има новинари и опозиционери на Путин кои се во затвор а лицата што се борат за човекови права се предмет на заплашувања.
Во април годинава 60 европски пратеници ги повикаа владите на ЕУ на дипломатски бојкот на Светскиот фудбалски шампионат во Русија како протест поради рускиот претседател Владимир Путин.
Според пратениците, Путин “се подбива во европските вредности”.
Овој повик дојде поради обидот за труење на агентот Сергеј Скрипал и неговата ќерка на британска територија.