Репрезентативците на Азербејџан мистериозно исчезнаа од Европското првенство во Сплит. Организаторот им загуби секаква трага по еден ден од нивното пристигнување во градот на Јадранот. Камран Исмаилов, Хусеин Исмаилов, Елнур Хусеинов, Илхам Мамадов и Иса Растамов резервирале хотелско сместување од 31 март до 8 април, но експресно „испарија“.
Азербејџанците без објаснување го напуштиле натпреварувањето. Шпекулациите во хрватските медиуми што се наведуваат како можна причина за „бегството“ упатуваат на ригорозните допинг контроли што биле најавени како уште позаострени за разлика од досегашните ЕП во кревање товар.
Интернационалната федерација во кревање товар лани суспендира седуммина репрезенти на Азербејџан кои добија забрана за настап и на Олимписките игри во Рио де Жанеиро. Меѓу нив беше и Бојанка Минкова, по потекло од Бугарија, која важеше за прва фаворитка за златниот медал во категоријата до 58 килограми.