Турција ја продолжува вонредната состојба за три месеци, одлучил турскиот претседател Реџеп Таип Ердоган, соопшти вицепремиерот Нуман Куртулмуш.
Куртулмуш изјавил дека продолжувањето на вонредната состојба ќе стапи на сила од 19 октомври, кога истекуваат првите три месеци, пренесува Ројтерс.
Советот за безбедност на земјата претходно препорача продолжување на вонредната состојба што беше наметната првично на 21 јули за 90 дена по неуспешниот обид за државен удар на 15 јули.
Парламентарното одобрение на мерката се смета за формалност, бидејќи владејачката Партија на правдата и развојот на Ердоган и десничарската Партија на националистичка акција, која ја поддржуваат вонредната состојба, го формираат потребното мнозинство.
Опозициски блок и Курдите изразуваат зголемена загриженост и повикуваат на ставање крај на мерките и враќање кон парламентарното управување.
Ердоган од своја страна изјави дека законодавниот орган не е подготвен да се справи со оваа ситуација во земјата.
Централно-левичарската Републиканска народна партија тврди дека повеќе невини луѓе беа уапсени за време на чистката по обидот за преврат и ја обвинуваат владата за прекумерни активности.
Според Ердоган, вонредната состојба е потребна за да се спротивстави на заканите против владата. За време на вонредната состојба тој издаде декрет за затворање на институции, вклучувајќи десетици медиуми, отпуштање на над 50.000 државни службеници и привремено отстранување на десетици илјади други. По неуспешниот пуч беа уапсени 32 000 луѓе.
Владата го обвинува за обидот за преврат Фетхулах Ѓулен, кој живее во САД и бара да биде екстрадиран во земјата. Ѓулен ги отфрла овие обвинувања.