Турскиот претседател Реџеп Таип Ердоган денеска најави дека ќе разговара за обновувањето на договорот за жито со генералниот секретар на Обединетите нации, Антонио Гутереш, за време на Генералното собрание на Светската организација кон крајот на месецов.
Ердоган рече дека е во близок контакт со Обединетите нации во врска со заживувањето на иницијативата за извоз на украинско жито преку Црното Море.
„Би сакал да повторам дека ги цениме и поддржуваме напорите на генералниот секретар Гутереш“, додаде Ердоган во разговор со новинарите доцна синоќа во претседателскиот авион додека се враќаше од посетата на Русија.
Турскиот претседател изрази уверување дека наскоро ќе биде постигнат „добар резултат“ за заживување на Црноморскиот договор за жито, што ќе ги исполни неопходните очекувања, јави агенцијата Анадолија.
– Ревитализацијата на иницијативата е приоритет за целиот свет. Ние сме во близок контакт со ОН за ова прашање, рече Ердоган.
Тој вчера беше во еднодневна работна посета на рускиот крајбрежен град Сочи за да разговара со рускиот претседател Владимир Путин за регионални и глобални прашања, како и за билатералните врски. Оживувањето на минатогодишниот историски Договор за жито во Црното Море, кој помогна да се олесни глобалната криза со храна, беше главното прашање на состанокот.
Москва во јули го суспендираше своето учество во Договорот, постигнат со посредство на Турција и ОН, за обновување на извозот на жито од трите украински пристаништа на Црното Море, што беше прекинат по рускатата инвазија врз Украина која почна во февруари минатата година.
Москва се пожали дека Западот не ги исполнил своите обврски за извоз на жито од Русија и дека недоволно украинско жито оди во земјите на кои им е потребно. Таа тврди дека ограничувањата на плаќањата, логистиката и осигурувањето стојат на патот на нејзините пратки.