Со првиот декрет од моментот на воведувањето на вонредна состојба во Турција, претседателот Реџеп Таип Ердоган затвори повеќе од илјада приватни училишта, 15 универзитети, 19 синдикати, 35 болници и повеќе од 1,200 добротворни организации. Објаснувањето, според Ердоган, е нивната врска со Фетула Ѓулен кој во моментов е во САД, а од некогашен сојузник се претвори во налутиот непријател на Ердоган кој што се сомничи за пучот.
По пучот кој се обиде да го спроведе дел од војската, а кој минатиот петок заврши неуспешно, пред два дена турскиот Парламент одобри воведување вонредна состојба во државата. Пратениците го поддржаа барањето со 346 гласа „за“ и 115 „против“, а истата ќе трае 3 месеци. Според турскиот претседател Реџеп Таип Ердоган оваа одлука е согласно Уставот и тој рече дека таа не е насочена против демократијата и граѓанските принципи. Ердоган наведе дека целта е брзо и ефикасно да се преземат мерки против приврзаниците на исламскиот проповедник Фетулах Ѓулен.
„Како врховен командант на вооружените сили, ќе се борам војската да ја исчистиме од сите вируси“, изјави Ердоган.