Почна средбата на македонскиот министер за надворешни работи, Никола Димитров, со шефот на грчката дипломатија, Никос Коѕијас , на кои се очекува да се разгледаат позициите на Скопје и Атина по меѓусебната размена на нацрт-договори за решавање на прашањето за името. По средбата и пленарни разговори меѓу македонската и грчката делегација Димитров и Коѕијас ќе одржат заедничка прес-конференција.
Коѕијас ќе има разговори и со премиерот Заев, претседателот на собранието, Џафери, лидерот на ДУИ, Ахмети и претседателот на ВМРО, Мицковски.
Грчките новинари кои ја следат посетата на Коѕијас на Македонија, објавија дека Грција била изненадена од македонската нацрт спогодба која беше испратена до Атина, два дена пред слетувањето на Коѕијас во Скопје.
„Климата во пресрет на разговорите би рекол дека е чудна. Постапката на скопската страна оддеднаш да прати текст со забелешки, на два дена пред средбата, предизвика загриженост во Атина, затоа што тоа не беше предвидено во процесот за кој се договорија двајцата премиери во Давос, јавуваат грчките новинари кои ја следат посетата на шефот на грчката дипломатија Коѕијас во Македонија, пренесе МИА.
Според новинарот на ЕРТ, македонската нацрт верзија имала радикални позиции. „Овој текст како да беше напишан од самиот Груевски, затоа што ги содржеше сите радикални позиции на скопската страна“, објави новинарот на грчката државна телевизија ЕРТ во директното вклучување од Скопје.
Грчките новинари коментираат дека денешниот ден е особено важен, бидејќи по маратонските средби во Скопје ќе се разјасни дали има поклопување на позициите на двете земји во пресрет на состанокот со медијаторот Нимиц во Виена, следниот петок.