Денешната седница за советнички прашања на Советот на Град Скопје, помина во атмосфера на отворена нетрпеливост меѓу претседателот на Советот, Трајко Славески и градоначалничката Данела Арсовска, која му упати зборови како „господин Хитлер“, „деспот“ и „тиранин“.
Откако Славески даде пауза поради неможноста да се користи говорницата во салата на Советот на Град Скопје бидејќи Арсовска му го „заплени“ копчето за вклучување и исклучување на микрофоните, седницата продолжи со порака од Славески со советниците да говорат од место или, пак, да седнат на помошното место до него каде може да се користи техниката.
Претходно тој го зеде микрофонот од говорницата и го стави под неговата маса откако службите не му го вратија копчето за вклучување и исклучување на микрофонот на говорницата.
Во тие моменти за збор се јави градоначалничката Арсовска, која Славески ја упати на микрофонот и местото до него, дофрлувајќи ѝ дека таа фотелја е многу поудобна од, како што рече, магарешките клупи во кои седи таа во задните редови од салата.
Арсовска, сепак застана на говорницата, со насмевка го проследи дофрлањето на претседателот на Советот, а потоа до неа дојде човек, веројатно од техничката служба на Град Скопје кој и намести мал микрофон т.н. „бубачка“.
Во истиот момент Славески повторно даде пауза од 15 минути бидејќи како што истакна повторно има неовластено користење на опрема и стана од своето место.
„Господине Хитлер не ви доликува да го правите овој циркус во овој Совет. Навистина е недолично тоа што го правите. Прво го кршите Уставот потоа сте ситен лопов и сте човек којшто краде и не е во ред тоа што го правите. Крадете. Тој микрофон е сопственост на Град Скопје и на службите“, му се обрати Арсовска на Славески.
По ваквите обвинувања тој се врати, застана пред неа прашувајќи ја „каде е украден микрофонот на што таа му возврати „тоа вие ќе кажете“.
И по втората пауза, повторно продолжи расправијата меѓу градоначалничката на Скопје и претседателот на Советот на Градот.
„За дванаесет месеци не научивте да водите седница и тоа само докажува дека вашиот капацитет е нула исто како што ви е интегритетот и согласно закон имаме право да избереме на кој начин ќе се изјасниме. Вие сте тука и деспот и тиранин“, рече Арсовска.
„И Хитлер сум, друго нешто имате?“, рече од своето место Славески, барајќи од Арсовска да ја напушти говорницата и да му го отстапи местото на советникот Шутаров.
„Немате право да одземате збор на градоначалник. Согласно Деловникот вие имате право да му го одземете зборот на советник, но не и на градоначалчникот“, реагираше Арсовска.
По ова Славески ја прекина седницата поради, како што рече, опструкции од страна на градоначалничката и заради нејзино недолично однесување.
„Единствено недолично однесување во оваа сала имате вие. Вие сте деспот и тиранин. Жал ми е што си ја завршивте кариерата како деспот. И немојте да ги организирате синдикатите против овој град. Вие директно му штетите на овој град со вашето однесување. Во два часот ако сте организирале да го тероризирате градот преку вашите политички синдикати да знаете дека граѓаните тоа го гледаат“, продолжи Арсовска додека советниците ја напуштаа пленарната сала на Град Скопје.
Седницата Славески ја презакажа за 14 ноември. Тој на почетокот на денешната седница, го повика Инспекторатот за локална самопурава да интервенира откако градоначалничката на Скопје му го одзеде копчето за вклучување и исклучување на микрофоните на советничката говорница.
И Славески и Арсовска попладнево си разменија соопштенија во кои продолжија меѓусебните обвинувања, со тоа што соопштението во име на претседавачот на Советот го издаде советничката група на ВМРО-ДПМНЕ преку партиската централа, а Арсовска реагираше преку својот кабинет.