ЕУ очекува брзо да се формира нов парламент и нова влада кои веднаш ќе почнат да ги спроведуваат итните реформи содржани во извештајот Рајнхајрд Прибе и кои ќе му дадат поддршка на Специјалното јавно обвинителство.
Ова преку соопштение го изјавија високата претставничка за надворешна политика на ЕУ Федерика Могерини и еврокомесарот Јоханес Хан доцна во понеделникот. Тие чекаа да бидат објавени прелиминарните резултати и извештајот на ОБСЕ-ОДИХР за изборите пред да реагираат.
Тие ги поздравија спроведените предвремени парламентарни избори во Македонија и повикаа Владата и опозицијата да продолжат со целосно спроведување на претходните политички договори, што вклучува и поддршка на работата на Специјалното обвинителство.
„Очекуваме брзо формирање на новиот парламент и на новата влада и спроведување реформи за решавање на системското владеење на правото, како и на итните реформски приоритети. Владата и опозицијата треба да продолжат со целосно спроведување на претходните политички договори, што вклучува и поддршка на работата на Специјалното обвинителство“, соопштија Могерини и Хан.