Бугарија се буни за повеќе формалности во заклучоците за Северна Македонија, како што дознава МИА од дипломатите присутни на разговорите на амбасадорско ниво. Една точка проблематична за Бугарија е употребата на долгото име, Република Северна Македонија, на која инсистира Софија.
ЕУ сѐ уште нема согласност за заклучоци за проширување пред утрешниот министерски состанок, спорот меѓу Северна Македонија и Бугарија е една од главните пречки, но не е единствена, јавува дописничката на МИА од Брисел.
Слично на минатата години земјите членки на ЕУ повторно не можат да ги усогласат заклучоците во делот на проширувањето. Доколку нема заклучоци ова би било втора година по ред како ЕУ не може да постигне согласност за оваа политика. Меѓутоа, овојпат поголема е веројатностa словенечкото претседателство да настапи со претседателски заклучоци и имиња на земјите кои ги поддржуваат, наместо, како што беше лани, воопшто да нема никакви заклучоци, брифираат дипломатите во Брисел за МИА.
Несогласувања има околу Турција и Босна и Херцеговина исто така, не само околу С.Македонија. Што се однесува до македонско-бугарскиот спор, Софија на состанокот минатата недела инсистирала дека Северна Македонија “не ги исполнува критериумите за отпочнување на преговорите“, став кој не добил поддршка од другите 26 земји членки, ниту од Европската Комисија. Опцијата за одвојување на Албанија од Северна Македонија “доби малку, односно никаква поддршка“, вели висок дипломат на ЕУ за МИА.
Бугарија се буни за повеќе формалности во заклучоците за Северна Македонија, како што дознава МИА од дипломатите присутни на разговорите на амбасадорско ниво. Една точка проблематична за Бугарија е употребата на долгото име, Република Северна Македонија, на која инсистира Софија.
Нацрт заклучоците на словенечкото претседателство го користат долгото име на сите земји од проширувањето во воведниот дел, потоа во остатокот од текстот се користи краткото име за сите (Северна Македонија, Србија, Албанија, итн.). Софија сака секаде да стои долгото име за Северна Македонија, што е исто така неприфатливо за мнозинството земји членки.
Се очекува краен компромис да биде употребата на долгото име за сите земји и во целиот текст, но не само за Северна Македонија, велат дипломатите. Крупно барање на Бугарија е да се вметне повторно реченицата за почитувањето на Договорот за пријателство како експлицитен дел од процесот на проширување за Северна Македонија.
Иако билатералните договори се секогаш споменати во овие заклучоци, за мнозинството земји членки на ЕУ е неприфатливо тоа да биде вклучено како специфичен дел во преговорите за С.Македонија бидејќи е голем ризикот со тоа да се создаде преседан и да се билатерализира целиот процес на проширување, што е спротивно на духот на новата методологија за претпристапни преговори на ЕУ, објаснуваат за МИА дипломатите во Брисел.
Софија има проблем и со временската одредница која е вклучена во нацрт заклучоците. Имено словенечкото претседателство смета дека во заклучоците треба да стои дека преговорите со Северна Македонија и Албанија “оваа година“. Разговорите сега се водат на повисоко ниво и утре министрите за европски прашања ќе разговараат на темата со цел постигнување компромис за конечните заклучоци пред самитот на ЕУ кој ќе се одржи в четврток и петок.
Доколку повторно нема заклучоци и словенечкото претседателство одлучи да поднесе само свои заклучоци со поддршка на поединечни земји, Бугарија би можела да биде изолирана ако сите други 26 земји членки на ЕУ се потпишат на заклучоците на претседателството. Разговорите на линија Софија – Скопје – Брисел продолжуваат и денеска и не се исклучува нов нацрт заклучоци до крајот на денот, велат дипломатите кои во голем дел не губат целосно надеж да се изнајде решение во последен момент за компромис и отпочнување на преговорите со Скопје и Тирана пред 31 декември.