Европската комисија денеска ќе ја објави стратегијата за проширување на Европската унија на Западен Балкан со патоказ за следните 3 години, до 2020 година, во 6 различни области во коишто Брисел предлага 57 конкретни проекти во економијата, правната држава или скиот развој, владеењето на правото или директните контакти помеѓу граѓаните за да се забрза влезот во ЕУ, дознава НОВА.
Стратегијата ќе прецизира дека сите земји во регионот имаат можност да напредуваат на европскиот пат врз основа на сопствени заслуги и брзината со која ќе ги остварат реформите.
Документот во Стразбур ќе го претстават високата претставничка на ЕУ Федерика Могерини и комесарот за проширување Јоханес Хан по што ќе следи расправа во Европскиот парламент. Стратегијата ќе им биде упатена на земјите членки кои за неа ќе расправаат на самитот во идниот месец.
Могерини и Хан ќе ја објават Стратегијата за кредибилната перспектива за проширување кон Западен Балкан, во која се предупредува на две важни прашања, кои се однесуваат на целиот регион, а кои треба да се решат пред пристапувањето на која и да е земја во ЕУ: дијалогот меѓу Србија и Косово и билатералните спорови.
Во најновата верзија на Стратегијата за Западен Балкан, се наведува дека земјите од регионот ќе станат членки на ЕУ, „но не во состојбата во која се наоѓаат денес“.
Црна Гора и Србија и натаму се идентификуваат како лидери во регионот, па нивниот прием во ЕУ се предвидува до крајот на 2025 година, со тоа што пристапните преговори би завршиле во 2023 година. Истата година, кога лидерите во регионот ќе ги завршат преговорите, се предвидува почеток на процесот со Босна и Херцеговина.
Македонија и Албанија се очекува да ги почнат преговорите во 2019 година.
Што ќе пишува за Македонија во балканската стратегија на Брисел
Крајот на 2019 година е рокот до кој Србија и Косово би требало да постигнат договор за сеопфатна нормализација на односите.
ЕК: Постои можност Србија и Црна Гора да бидат во ЕУ до 2025 година
Делегацијата на ЕУ во земјава ќе организира директен пренос на прес-конференцијата, по која на новинарите ќе им се обрати амбасадорот на ЕУ, Самуел Жбогар.
Вицепремиерот за европски прашања Бујар Османи вчера изјави дека Македонија очекува во Стратегијата да добие јасна европска перспектива, но и можност да го достигне рокот заедно со Србија и Црна Гора во 2025 година да стане дел од Унијата.
Според него, треба да се има предвид дека Македонија има најголемо искуство во овој процес, најдолго е во овој процес и во реалноста има постигнато многу во смисла на хармонизација со европската легислатива и во исполнување на критериумите.
Официјално документот што денеска ќе биде презентиран во Стразбур, на македонските власти ќе им биде доставен од евроамбасадорот Самуел Жбогар.
Лидерите од Западен Балкан во изминатите неколку месеци повеќепати беа на средби со еврокомесарката Могерини на разговори за Стратегијата.
За крајот на јануари најавена е посетата на претседателот на Европската комисија Жан Клод Јункер на Македонија, додека за март, на високата претставничка на ЕУ за надворешна политика и безбедност Федерика Могерини.
Нивната посета се толкува како поддршка на процесот околу решавање на спорот околу името со Грција и почетоците на преговори за интеграција во ЕУ.