Претседавачот на Советот на министри, шефот на холандската дипломатија Берт Кундерс, за НОВА изјави дека излезот од кризата се состои од датум за избори, услови за слобода на изразување и да се спроведат судските процеси според националните и интернационалните стандарди.

Берт Кундерс даде кусо интервју за НОВА на крајот на сесијата на министрите за надворешни работи на ЕУ во Брисел.

Кундерс смета дека излезот од македонската криза се наоѓа во исполнување на сите услови:

“Сите партии треба околу тоа да се согласат и да најдат пат кон излез од кризата. Според мене тоа се состои од датум за избори, услови за слобода на изразување и да се спроведат судските процеси според националните и интернационалните стандарди.”

Претседавачот на ЕУ подвлекува дека излезот од кризата е одлука на македонскиот народ:

“Ни јас ни Европа не сме тие кои треба да одлучат и да ја решат ситуацијата. Тоа е одлука на македонските граѓани кои треба да каже дали сака фер и слободни избори и да придонесат за интеграција во евро-атланската структура.”

Неодамна Кудерс беше во посета на Македонија каде се сретна со сите политички лидери и потсетува дека неговата земја Холандија има долга историја со Македонија:

“Бевме активни и во 90 години и во други тешки моменти. Искрено се надевам секој ќе ја искористи можноста да и помогне на земјата на тргне напред.”

На прашањето дали оваа криза може да донесе и безбедносен ризик тој одговара:

“Не сакам да зборувам за безбедносен ризик. Но има ризик за луѓето на Македонија. Сите треба да работат заедно за нивната заедничка иднина. Луѓето сакаат реформи, работа, образование, добри надворешни граници и верувам дека сакаат да бидат дел од евро-атлантската структура. Но изборот е нивен”, вели Кундерс.

Пред почетокот на министерскиот состанок и други министри изразија загриженост за македонската криза. Британскиот министер Филип Хамонд изјави дека Македонија во изминативе девет месеци или повеќе назадува.

“Ние треба да бидеме јасни и искрени со Македонците дека ако продолжиме да ја гледаме истата ситуација, тие нема да напредуваат во соработката со ЕУ и НАТО. Мора да го променат ваквиот тренд и да се вратат на вистинскиот пат, инаку сите бенефиции од ЕУ и НАТО ќе ги загубат, предупреди британскиот министер.”

Германскиот државен министер Михаел Рот денеска од Брисел порача дека Берлин е „екстремно загрижен за внатрешно-политичката состојба во Македонија“. Притоа, тој наведе два услова кои земјата итно мора да ги исполни: создавање услови за демократски и слободно избори и целосна поддршка за работата на Специјалното јавно обвинителство.

„Политичките партии повеќе не смеат да го ставаат на тест трпението на меѓународната заедница и на Европската Унија и мора да остварат конкретни резултати“, предупреди Рот.

На барање на Германија денес на дневниот ред на Советот на министрите за надворешни работи требаше да биде ставена дебата за Македонија но таа беше одложена за наредниот месец поради отсуството на германскиот министер кого го заменуваше државниот министер Рот.