Поради недоволните болнички капацитети во Италија, германската армија почна со пренос на италијански пациенти со коронавирус во Германија. Освен нив, во земјата се лекуваат и заболени лица од Франција.
Ситуацијата во болниците во северна Италија е драматична, па германската воена авијација почна да пренесува италијански пациенти на лекување во Германија. Авионот за интензивна нега на Бундесверот, „Ербас А310 МедЕвак“ вчера полета од аеродромот во Келн кон Бергамо за да преземе шест пациенти во тешка здравстевна состојба.
„Во време на голема потреба се подразбира само по себе дека ќе бидеме на страната на нашите пријатели. Затоа со нашата летачка станица за интензивна нега на воената авијација сега префрламе најтешко болни пациенти од Италија на лекување во Германија. Тоа е важен знак на солидарност. Европа мора да се држи заедно“, изјави германската министерка за одбрана Анегрет Крамп-Каренбауер.
Авионот вчера попладне требаше да се врати во Германија, а пациентите би требало да бидат префрлени во две цивилни болници. Според информации на агенцијата ДПА, двајца ќе бидат во Католичката клиника во Бохум, а по двајца на универзитетските клиники во Келн и во Бон.
Ербасот „А310 МедЕвак“ на Бундесверот може одеднаш да превезува шест пациенти на кои им е потребна интензивна нега. Освен тоа, има и 38 места за лежење, при што за 16 пациенти е можен засилен медицински надзор.
Од германското Министерство за надворешни работи се вели дека досега во осум германски покраини се обезбедени 73 места за италијански пациенти. Освен тоа, во четири покраини се лекуваат 30 француски пациенти.
