Комитетот за надворешни работи на Европскиот парламент (ЕП) ја усвои предлог-Резолуцијата за Македонија со 54 гласoви за и осум против.
Предлог-Резолуцијата ја потврдува поддршката на процесот на пристапување на земјата во ЕУ и констатира дека изборите биле во согласност со меѓународните стандарди.
Текстот бара преглед на Охридскиот рамковен договор како што тоа го бара и Европската комисија во сите свои годишни извештаи.
“ЕП ги потсетува владините и партиските лидери на своите заложби за целосно спроведување на Охридскиот рамковен договор на инклузивен и транспарентен начин, да се заврши задоцнетиот преглед без натамошно одлагање, вклучувајќи ги и политичките препораки и да се обезбеди доволен буџет за негово спроведување. Се осудува секој облик на иредентизам и секој обид да се распаднат различни социјални групи и се нагласува важноста да се започне долгоочекуваниот попис без натамошно одлагање”, се бара во предлог-Резолуцијата.
Се бара исто така, како и досега, отворање на преговорите за членство со ЕУ:
“Регионалната соработка и добрососедските односи се суштински елементи на процесот на проширување, Процесот за стабилизација и асоцијација и процесот на пристапување на земјата, билатералните спорови не треба да се користат за да се попречи процесот на пристапување во ЕУ, ниту за отворањето на преговорите за членство, но да бидат соодветно опфатени во конструктивен дух и во согласност со стандардите на ЕУ и на ОН, а сите напори треба да водат кон одржување на добрососедските и меѓуетничките односи”, вели текстот.
Пратениците бараат и „формирање на нова, стабилна и одговорна Влада и транспарентна транзиција, во согласност со уставните и законските барања и постапки“.
ЕП стравува дека некоја партија би можела да го бојкотира Собранието па оттука со текстот се повикуваат сите партии во Македонија „да се воздржат од какво било попречување во однос на ефективното функционирање на парламентот“.
Во текстот на предлог-Резолуцијата чиј автор е словенечкиот пратеник Иво Вајгл се употребува терминот „Македонија“ и „македонски“.
На 14 март предлог-Резолуцијата треба да биде усвоена на пленарна седница.
Резолуциите на ЕП немаат законска сила.