Претседателот на Европските либерали и демократи, Ханс Ван Баален кој е воедно и пратеник во Европскиот Парламент, силно го осуди одлуката за помилување, објавен од претседателот на Република Македонија, Ѓорге Иванов, за сите политичари инволвирани во скандалот со масовното прислушкување, кој предизвика длабока политичка криза во општеството.
– Македонија навлезе во силни политички превирања по објавувањето на дел од прислушкуваните материјали во 2015. Македонскиот претседател со својата еднострана одлука ги запре и истрагите за сомневањата за злоупотреба на службената положба откриени преку објавените прислушкувани разговори, притоа изјавувајќи дека одлуката за ваквата негова постапка е „да стави крај на оваа агонија за Македонија“, се вели во соопштението од Либералнодемократската партија.
Коментирајќи ја постапката на Иванов, претседателот на Европските либерали и демократи вели дека „помилувањата на македонскиот претседател Иванов за политичарите инволвирани во аферата со прислушкувањето, претставува флагрантно кршење на договорот од јули 2015, постигнат со посредство на ЕУ“.
– Специјалното јавно обвинителство мора да биде во позиција целосно и независно да ги спроведе сите истраги во нивна надлежност, и никакви помилувања не треба да се даваат. Европската унија мора да стави јасно до знаење дека Иванов треба веднаш да ја повлече својата одлука, се вели во соопштението.